Qaqortumi qatserisartut majuartarfittaavi qamutillit qatserisarfimmi inissaqartinneqanngimmata qatserisarfik allilerneqarpoq, taakkulu annaasiniaanerni assigiinngitsuni atorneqartassapput.
Qatserisartut majuartarfii qamutillit tummerai qummut 32 meterit tikillugit siaarsinnaasut, qamutitaasa portussusai takissusaalu Qaqortup qatserisarfianut tattuummata inissaqartinneqanngillat. Tamanna aporfiussanngimmat kommunalbestyrelsip siuliata majuartarfinnut qamutilinnut Qaqortumi qatserisarfik inissaqartikkumallugu qatserisarfiup allilernissaannut akuersissuteqareernikuuvoq, tamannalu maanna sulissutigineqaleruttortoq sanaartornermut ingerlatsiviup pisortaata oqaatigaa.
-Qaqortumi qatserisarfiup allilernissaannut atortussat piniareersimaneqalerput, taakkulu atortussat tikeriarpata qatserisarfik allilerlugu aallartittariaannanngussaaq. Naatsorsuutigaarput oktoberip qaammataani alliliineq piariisasoq, taama oqarpoq teknikkeqarnermut Avatangiisinullu Ingerlatsivimmi sanaartornermut akisussaasoq Josef Kreutzmann.
Kalerriineq qanoq ittuunersoq aallaavigalugu qatserisartut majuartarfittaavi qamutillit nutaat atorlugit pisoqarfimmut orniguttassapput, illunullu portusuunut ikuallattunut sukkasuumik qamiterisoqarsinnaassalluni.
-Illuni portusuuni ikuallattoqartillugu qamisaanermi inunnillu annaasiniaanermi taakku atorlugit sukkasuumik majuartoqarsinnaavoq. Annertuumik ajutoortoqasimatillugu akiutinik ikkuffissaqarpoq, isumannaatsumillu inuk ajutoorsimasoq ingerlaneqarsinnaalluni, taama oqarpoq Kommune Kujallermi Upalungaarsimanermut pisortaq Asmus Hansen.
Qatserisartut ikuallattunik kisiat suliaqartanngimmata qatserisarfimmi majuartarfittaarsuit qamutillit aamma upalungaarsimanissamut allatut atorfissaqartinneqarput, angallannermilu ajutoortoqarsimatillugu iluaqutaalluarsinnaallutik.
-Tikikkuminaatsoq soorlu illup illua tungaa taakkuninnga tikinneqarsinnaavoq, umiarsuarmilu usingiaasoqartillugu lastiani ajutoortoqassappat, majuartarfiit qamutillit annaasiniaanermi atorsinnaalluarput. Inuinnaat biilii aamma ajutoorlutik aqquserngup avataanut pisimappata qatserisartut majuartarfittaavi qamutillit atorlugit qaqinneqarsinnaassapput, taama naggasiilluni oqarpoq Kommune Kujallermi Upalungaarsimanermut pisortaq Asmus Hansen.