Kommune Kujallermi Kommunalbestyrelse siullermeerluni Nanortalimmi innuttaasunik ataatsimiititsivoq. Innuttaasut 17-it kommunalbestyrelsit nutaat naapikkumallugit illoqarfimmilu ineriartorneq oqalliseqataajumallutik takkupput. Innuttaasunik ataatsimiititsineq sioqqullugu kommunalbestyrelsit atuarfimmi meeqqerivinnilu, Majoriami, aalisakkerivimmi utoqqaallu illuanni sulisunik naapitsipput.
Innuttaasunik ataatsimiititsinermi innuttaasut akiitsunik pitsaasumik akilersuilernissaat pillugu qanoq iliortoqarsinnaanersoq taamalu innuttaasut akiitsuinik 89 mio. kr.-iusunik kommune qanoq pissarsisinnaanersoq sammineqarluarpoq.
Oqaatigineqartut ilaat tassaavoq inuit imminnut ikiorsinnaanngitsutut isigineqarunnaartariaqartut.
Inuusuttut akisussaaffimmik tigusinissaannut tapersersorneqartariaqarput ilinniagaqalernissaannut aqqutissiornerisigut, aalisartut inuusuttut aalisarnermut akilersinnaanerpaamut aqqutissiornerisigut kiisalu inuusuttut pisortanit ikiorsiissutinik isumalluuteqarunnaarsinnerisigut. Majoriaq pillugu tusagaq nuannersoq tassaavoq atuartut atuarnerminnik unitsitsiinnartarnerat eqqarsaatigalugu nunatsinni appasinnerpaatut toqqagaasimammat.
Illoqarfimmi ilinniartitsisut ilinniarsimasut kiisalu pisortat sullissiveqarfiini sulisut ilinniarsimasut amigaataapput - aammalu illuutit qassiit assut aserfallassimallutik.
Borgmester Stine Egede ima oqarpoq:
“Nanortalimmi paaqqinnittarfiit illutaat pitsanngorsartariaqavippavut kiisalu sullissiveqarfiit
assigiinngitsut qanoq atorluarnerunissaat isumaliutigisariaqarparput. Illoqarfimmi meeqqat assut ikilisimapput, assersuutigalugu atuartut angerlarsimaffiat 32-inut inissaqarpoq, taamaattorli najugaqartut sisamaannaapput. Taamaammat nutaaliorsinnaasariaqarpugut kiisalu isumatuunik siunissarlu isigalugu aalajangiisariaqarluta.”
Aalisakkerivik tarajortikkanik tunisassiorfiusoq pulaarneqarmat oqaatigineqarpoq sulisut ukioq kaajallallugu 35-iusartut.
Sila pissutigalugu nunaqarfiit angalanermi tassani tikinneqanngitsoortut kingusinnerusukkut tikinneqarumaarput.
Innuttaasut ineriartornermik ilorraap tungaanut saatsitsisinnaanerat saatsitserusunnerallu upperisariaqarparput
Udgivet d. 17. august 2021