Pilersaarutaasimasut malillugit Qaqortumi mittarfissaq siornali sanaartorneqarluni aallartittussaagaluarmat pilersaarutit alloriarfissallu ersarissut piaartumik pisariaqartut kommune Kujallermi borgmesteri isumaqarpoq.
Qaqortumi mittarfittaarnissaq siunniunneqarmat pilersaarutaasut malillugit maanna mittarfissaq suliarineqarluni aallartereersimasussaagaluartoq, suliariumannittussarsiuussinerup aappassaanik iluatsinnginneranik peqquteqartumik sanaartornissaq ukiumik ataatsimik kinguaattooqqareerpoq.
-Uggornarpoq suliariumannittussarsiuussinerup iluatsittumik inerneqannginnera. Qaqortup Narsallu akornanni mittarfittaarnissamut inuussutissarsiuteqartut ilaat piareersaateqarlutik aallartereernikuupput. Taamaattumik mittarfissaq pillugu pilersaarutit ersarissut pisariaqavipput, kinguartitseqqiinissamummi akissaqanngilagut. Kinguarsarneq akikinnerulersitsinavianngilaq. Mittarfiliornissarmi mittarfittaarnissarlu kommunitsinni inerisaaniarnitsinni piffissaq qaninnerusoq ungasinnerusorluunniit eqqaarsaatigalugu atorfissaqartipparput, borgmester Stine Egede oqarpoq.
Qaqortumi mittarfissaq pillugu pilersaarutaasut pillugit qanoq ingerlariaqittoqarnissaa angallannermut Naalakkersuisup Kommune Kujallermi qinikkanut piffissami aggersumi nalunaarpoq saqqummiutissallugu.
-Maanna qilanaarutigaara Ineqarnermut, Attaveqatigiinermut, Aatsitassanut Naligiisitaanermullu Naalakkersuisup Naaja Nathanielsenip Kommunitsinnut tikilluni killiffimmik saqqummiiartornisaa, saqqumiinissaminik saaffiginnissutaa augustip naalererani pisussaq isumalluarfigaara, Stine Egede naggasiivoq.