Karsit aappaluttut Kommune Kujalliup ilisarnaataanik ilisarnaaserneqarsimasut, kujataani illoqarfinni nunaqarfinnilu angerlarsimaffinnut agguaanneqarsimalerput.
Karsinik agguaassineq angerlarsimaffinni eqqagassanut avatangiisinut navianartunut immikkoortitserisalernissamik siunertaqarpoq.
-Karsit angerlarsimaffinnut agguaanneqartut silamiitinnagit illup iluaaniitinneqarnissaat kaammattuutiginarpoq. Karsit immerneqarsimasut ulikkaarneranni kommunimut sianerluni saaffiginninnikkut najugarisap silataanut inissinneqarsimasut aaneqartassapput, nunaqarfimmiikkaanni illoqarfimmiikkaanniluunniit sinerfissat karsit agguaanneqarneranni quppersagaaqqami allassimapput, Kommune Kujallermi ingerlatsinermut, nunaqarfinnullu aqutsisoqarfimmi pisortaq Sem Ottosen nassuiaavoq.
Eqqagassat avatangiisinut navianartut soorlu batteriit, elektronikkit mikisualuit ilaatigut oqarasuaatit angallattakkat, nujaajaatit, putsunut kalerrisaarutit, eqqiaanermut atorlut sakkortuut puukui, qalipaatit, akorutissallu ulorianassutsimik ilisarnaatillit karsimut aappalaartumut iginneqartassapput.
-Neriuppunga karsit atorluarneqarumaartut, angerlarsimaffippassuarnimi eqqagassat suulluunniit eqqaavimmut ataatsimut eqqarneqartarput. Tamaalillunilu eqqakkat ikuallaavimmi ikuallanneqartussaanngikkaluit ikuallanneqarsinnaasarput, ajoraluartumillu taakkuupput ikuallaavimmut aserorsaataasartut avatangiisimullu minguttitsisuullutik. Taamaattumik neriuppunga eqqakkanut avatangiisinut navianartunut eqqaaviit atorluarneqarumaartut, Sem Ottosen oqarpoq nangillunilu.
-Karsit avatangiisinut navianartunut immikkoortitserivissat saniatigut igalaaminernut qillertuusanullu eqqaaviit nunaqarfittatsinni illoqarfittatsinnilu aamma pigaagut, taakku ukiuni kingullerni atorluarneqarnerat maluginiarsimavarput. Kaammattuutigerusupparalu aamma taakku suli atorluarneqarnerusinnaanerat, Sem Ottosen naggasiivoq.