Kommune Kujallermi Atuarfeqarnermut, Meeqqeriveqarnermut Nutaaliornermullu Ingerlatsivik ataatsimiititaliamut suliartik pillugit naapeqatigiissuteqarput.
Naapeqatigiinnermi Atuarfeqarnermut Meeqqeriveqarnermut Nutaaliornermullu Ingerlatsivik, tassa AMN-ip ataatsimiititaliaminnut, ulluinnarni suleriaasertik pillugu saqqummiuppaat.
Atuarfeqarnermut Meeqqeriveqarnermut Nutaalionermullu Ataatsimiititaliami siulittaasup naapeqatigiinneq kissaataasoq oqaatigaa.
-Ulluinnarni sulisut suliaasa suunerat, qanoq ingerlanerat, sumut killinnerat, sulianik ingerlatsinermi suliat ingerlateqqinnissaannut sunik qanorlu pisariaqartitsinerat paasissallugu malinnaaffigissallugulu ataatsimiititaliami ilaasortaasugut tamatta pisussaaffigaarput soqutigilluinnarlugulu. Taamaammat pingaartippara ataatsimiititaliami susassaqarfiini sulisut tikillugit ilassinissaat, taama oqarpoq Meeqqeriveqarnermut Atuarfeqarnermut Nutaaliornermullu Ataatsimiititaliami siulittaasoq Bibi Kielsen.
AMN ingerlatsivimmi sulisut ulluinnarni suliarisartakkatik pillugit meeqqeriveqarnermut, atuarfeqarnermut nutaaliornermullu sulisut akisussaaffitik suliatillu, Narsamiit Nanortalimmiillu skype-kkut ilaatitaqarlutik saqqummiussipput.
Meeqqeriit atuarfiillu sullilluarniarlugit meeqqeriveqarnermut atuarfeqarnermullu inatsisartut inatsisaat, peqqussutaallu eqquutsinniarnissai qulakkeerniartussaagitsik, AMN ingerlatsivimmi pisortaagallartup oqaatigaa.
-Neriuutigaarput pitsaasumik paasititsisimassalluta, politikkikkut sulinermi Ingerlatsivimmilu sulineq ataqatigiissumik ingerlalluarnissamillu qulakkeerinninneq taamaasilluni pisinnaanissaa qanillissaaq. AMN Ingerlatsivimmiit ataatsimiititaliallu siulittaasualu tamatta kissaatigisimavarput taamatut naapeqatigiinissaq, taamaattumik ukiut sisamat suleqatigiilluartoqarnissaannik tunngaviliisooqataajumaartoq neriuutigaara, taama oqarpoq Atuarfeqarnermut Meeqqeriveqarnermut Nutaalionermullu Ingerlatsivimmi pisortaagallartoq Ruth Jakobsen.
Kommune Kujallermi AMN Ingerlatsiviup ataaniittut illuutit inissisimaffii pillugit, teknikkeqarfimmiit saqqummiussisoqarluni naapeqatigiinneq naggaserneqarpoq.