Maanna kommunitsinni Covid-19-imik tunillatsissimasueruppoq, tamanna qujamasuutigaara. Taamaakkaluartoq suli tamatta mianersortariaqarpugut. Sulinngiffeqarlutimmi angalasut imaaginnavipput, taamaammat pisortat maleruaqqusaat suli tamatta malittuarallarnissaat kissaatigaara.
Akiuussutissamik kapitissimanngitsut kaammattorusuppakka kapitinnissamik periarfissaliussat atorluaqqullugit, taamaasiornikkut aamma Covid-19-ip akiornissaanut isumannaarinneqataassammata.
Kommune Kujallermi Covid-19-imut tunillatsissimasut amerliartuleraluarmata ikiuuttorpassuarnut qamannga qujarusuppunga. Nammineq kajumissutsiminnik ikiuuttut, misissuisut, peqqinnissaqarfimmiut, akiuussutissalersuisut, innuttaasut tikeraallu mianersortut, allallu Covid-19-imut akiuiniarnermi suleqataasut tamaasa qujaffigaakka. Ikioqatigiittoqarsimanngikkaluarpat suliniarneq ilungersunarnerusimasinnaasoq qularinngilara.
Periarfissaq manna iluatsillugu pingasunngornermi ullaap tungaani radiukkut apersorneqarninni utoqqaat illui suli matoqqasut oqaaseqarfigaakka, kukkuneq ajuusaarutigalu naqqiissaanga; ataasinngorneq juulip 26-at aallarnerfigalugu utoqqaat illuiniittuutillit ilaminnut pulaarsinnaanngorsimammata.
Mianersornissamik suli kaammattueqqillunga qanortoq tamatta pisortat maleruaqqusaat malitsigit, immitsinnut paaraluta akisussaaffimmillu tigusilluta covid-19 tamatta akiortigu.
Asasakka Kommune Kujallermi innuttaasut
Udgivet d. 05. august 2021