Kommune Qeqertalimmi maanna Covid-19-imik tunillatsittoqarfiusumi borgmesteri Ane Hansenip akissarsiffinni imerniartarfiit matoqqatinneqartarnissaannik kaammatuinera kujataani borgmesterimit taperserneqarpoq.
Kommuni Kujalleq maanna covid-19-imik tunillatsisimasoqanngilaq, juulilli qulingiluaanni Qaqortumi imerniartarfimmi tusarnaartitsisuni tusarnaariarsimasut ilaat Covid-19-imik tunillatsissimasoq paasineqareersorlu Kommune Kujallermi tunillatsissimasut arlallit paasineqarput.
-Inuit imerniartarfimmi ataatsimoortut imminnut qanillutik, eqitaarlutik, qittallutillu ataatsimoorsinnaasarput. Tamaannerani Covid-19-imik tunillatsissimasumik akornaniittoqarsimatillugu tuniluunneq sukkasuumik ingerlasinnaasarpoq, matumanilu politiit peqqinnissaqarfimmilu sulisut suliassaqareeqisut misissuinissamik annertuumik suliassaqalertarput. Tamanna Qaqortumi imerniartarfiit ilaanni nalaanneqarmat inuit 250-it imerniartarfimmiissimasut misissorneqartussanngorput, Stine Egede nassuiaavoq.
Nunarput tamakkerlugu Covid-19-imik tunillatsissimasut maanna 60-it sinneqarput, mianersornissarlu pisariaqavimmat akissarsiffinni imerniartarfinnik matoqqatitsisarnissaq imaluunniit mianersornissaq qulakkeerniarlugu allatut killeqartitsinikkut iliuuseqarnissaq inissaminiittoq borgmesteri Stine Egede isumaqarpoq.
-Niuertarfinni inuit eqitaartut qanittuaraallutillu ataatsimoorlutik pisut ulluinnarsiutigiunnaarnikuaagut, imerniartarfinnili inuit ataatsimoortut akornanni assiliaq allarluinnaammat matumani mianersortoqarnerusariaqarpoq. Matoqqatitsisoqassanngippallu mianersornissaq eqqarsaatigalugu allatut killilersuilernikkut aaqqiisoqarsinnavoq, soorlu ammasarfinik allannguinikkut imalunniit inuit ataatsimoornissaannut maleruagassanik aalajangersaasoqarneratigut, tamanna pisariaqavippoq pingaartumik inuusuttut ilinniariarlutik angalaleruttorfiini immerniartarfinni ataatsimoornerit pisartillugit, Stine Egede oqarpoq nangillunilu...
-Piffissami matumani nunatsinni Covid-19-mik tunillatsissimasut aatsaat taama amerlatigipput, tamatta akisussaaffimmik tigusilluta mianersortariaqarpugut. Periarfissarlu manna iluatsillugu kujataani innuttaasut akisussaaffimmik tigusillutik mianersornerannut aamma tuniluunnerup nalaani imerniartarfiutillit imerniartarfiutiminnik matoqqatitsinerannut qujarusuppunga, tamannami ullumikkut kujataani tunillatissimasoqarunnaarneranut isumaqaqaaq, Stine Egede naggasiivoq.