Ukioq manna qaannamik unammersuarnermi illoqarfikkaartumik pokali ingerlaartoq, Qajaq Qaqortup meerartaasa sisamaniit 14-inut ukiullit tiguaat.
Qaannamik unammersuarnerit juulip ulluisa arfineq-sisamaanniit juulip 12-iat ilanngullugu Nuummi ingerlanneqartoq, Qaqortumiit unammigianik 31-iusunit peqataaffigineqarpoq.
Inersimasut meeqqallu qaannamik unammeqataasut tamarmik angusarissaarput, meeqqalli angusarissaarluartut sungiusaasup oqaatigaa.
-Pointit angusat aallaavigalugit illoqarfikkuutaartumik inissinneqartarput, tassanilu Qajaq Qaqortup meerartai siullerpaatut inissipput inersimasullu pingajuattut inissillutik. Meerartatta angusaat kusanartorujussuuvoq, tamannalu tulluusimaarnaqaaq, Abel Jakobsen Qajaq Qaqortumi siulittaasuusoq sungiusaasuusorlu oqarpoq.
Qajaq Qaqortumi ilaasortat ukioq kaajallallugu sungiusarneq ingerlattarpaat, aasami kiatsinnerani immami parrunneq sungiusarnerillu ingerlanneqartarput, ukiukkullu atuarfiup eqaarsaartarfiani allunaariaqattarnerit qasujaallisarnerillu ingerlanneqartarlutik.
Borgmesteri tusarluartoq
Illoqarfik kommuniluunniit sinnerlugu angusarissaartoqartillugu
nuannaarutaanngitsoorneqartanngillat, pingaartumik meeqqat pineqartillugit, Kommune Kujallermi borgmesteri qaannamik unammersuarnermi angusat pillugit qujamasuppoq.
-Peqatigiiffik Qajaq Qaqortoq illoqarfimmiuusugut qanoq eqeersimaartigisumik ingerlanneqarnera arajutsisimagunanngilarput. Meeqqat susassaqartilluarneqarnerat toqqissisimanartuuvoq, angajoqqaallu tapersersuilluarnerat arajutsisassaanani. Suleqataasut tamaasa qujaffigerusoqaavut, covid-19-ip killilersuinera qaangiussimaleriarutsigu malunnartitsissaagut, Kommune Kujallermi borgmesteri Stine Egede taama oqarpoq.
Aappaagu qaannamik unammersuarneq Ilulissani ingerlanneqassasoq pilersaarutaavoq.