Borgmester Stine Egede: -Ataatsimiititaliamik naapeqateqarneq pissarsiffiulluarpoq
Ataasinngornermi juulip tallimaanni ataatsimiinneq Qaqortumi kommunip ataatsimiitarfiani nalunaaquttap akunnerini pingasuni ingerlanneqartoq ataatsimiititaliami ilaasortanit, kommunimiit, Innovation South Greenlandimiillu peqataaffigineqartoq pissarsiffiulluarpoq.
-Nuannaarutigivara ataatsimiititaliap ataatsimeeqatiginera eqqartueqatigiiffiulluartumik pissarsiffiulluarnera. Illuatungeriilluta eqqartueqatigiinnitsinni, ullumikkullu kujataata sorpassuartigut kinguussaasimanera qujanavissumik ataatsimiititaliamit maluginiarneqarsimasoq pillugu inerisaanissamut alloriarfiusinnaasunik eqqartueqatigiippugut, Stine Egede oqarpoq.
Ataatsimeeqatigiinnermi aalisakkanik atorluaanikkut qajuusaasiorsinnaneq, savaateqarfinniit savaateqarfinnut aqqusinernik iluarsartuussisarnerup eqqarsaatigilluagaanerusumik suliarineqartarnissaat ilaatigut eqqartorneqarput.
-Savaateqarfinni nunaqarfittatsinnilu aqqusernit ukiut tamaasa aqqusinigissarneqartuartartut eqqarsaatigilluagaanerusumik suliarineqartalernissaat, kujataanilu aalisagarpassuit piniarneqarneq ajortut atorluarnerisigut nerisassiarineqarlutillu nerukkaatissiarineqarsinnaaneri, puisit amiinik tunisassiortarneq aamma kangerlunni qanga raajarniarfiulluarsimasut pinngitsooratik misissorneqartariaqalerneri, tunumi allamiut misileraasut tulaassisussaatitaasariaqalerneri, minnerunngitsumik tunisassiorfiutillit namminersortut inerisaaqqinnissanut tapersersorluartariaqarneri eqqartukkatta ilaminiinnannguaraat, Stine Egede nassuiaavoq.
Ataatsimeeqatigiinnermi kujataani piniarnermut aalisarnermullu nakkutilliisoqannginnerani savaatilinnit akisunaarneqarsinnaasarnera aamma eqqartorneqarpoq.
-Aasanerani ukiariaanilu savat pinngortitami angalaleraangata unioqqutitsilluni piniarneqarsinnaasarput, nakkutilliisoqannginnera savaatilinnut akisusinnaasarpoq unitsinneqartariaqarlunilu. Ataatsimiititaliamik naapeqateqarnerput iluarisimaarpara, imminullu pilersornerunissaq eqqarsaatigalugu Naalakkersuisoqarfiup qanimut suleqatigalugu inerisaaqatigiinnissaq qilanaaraarput isumalluarfigalugu, Stine Egede iluarisimaarinnilluni naggasiivoq.