Kommune Kujallermi aningaasaqarneq illorraap tungaanut saqitinniarlugu Aningaasaqarnermut Ataatsimiititaliaq sukannersumik aningaasatigut aqutsisoqarnissaanik siunniussaqarpoq.
Kommunimi aningaasat 2021-mut missingersuutaasut apriilip naalernerani 13,5 mio. koruuninik sipporneqarsimapput, sippuinerli juunip naanerani 4 millioninik annertunerulereersorlu Aningaasaqarnermut Ataatsimiititaliaq ataatsimiinnermini sukaterisoqarnissaanik siunnerfeqarpoq.
-Qinersisoqareerneqarata kingorna kommunimi missingersuut 2021 malinneqanngitsoq iserfigaarput, matumani pissutaavoq ingerlatsiviit missingersuutaareersunit atuinerusimanerat. Kommunillu aningaasanik tigoriaannarnik uninngasuuteqarnera killeqarmat iliuuseqarfiginngikkutsigu ukiup naanerani aningaasaqarnerput pitsaasumik inerneqarnavianngilaq, taamaammat piffissaatillugu iliuuseqarluta aningaasatigut aqutsineq sukateriffigalugu siunnerfeqarpugut, borgmester Stine Egede nassuiaavoq.
Kommunip aningaasaqarnerata killiffia pillugu Aningaasaqarnermut Naalakkersuisoqarfik paasitinneqareerpoq, akissaqarniarnerlu pataajaatsoq siunertaralugu aningaasanik attartornissaq siunnissat ilagaat.
-Sukannersumik aqutsisoqarnissaani angalanerit pingaaruteqanngitsut unitsinneqarnissaat, suliffeqarfimmilu nalilinnik pisiortornissaanut pisortanit qullersaasunit akuerineqaqqaarluni pisinnaanngortitsineq, aamma atorfinititsinissanut unititsigallarneq allaffissornermilu sulisut qaangiuttoorlutik sulisarnerisa unitsinneqarnissaat siunniunneqartut ilaagaat, Stine Egede oqarpoq erseqqissaallunilu.
-Atorfinititsinissamut unititsigallarnerput isumaqanngilaq ukiup sinnerani atorfinititsisinnaajunnaavittugut. Matumanimi pisortanik amigaatigineqartunik aamma inatsisitigut pisariaqavittunik soorlu atuarfinni sulisunik atorfinititsisinnaaneq ingerlaannassaaq, Stine Egede oqarpoq.
Sukaterinermut atatilligu Aningaasaqarnermut Ingerlatsivik kommunimi ingerlatsiviit akimorlugit aaqqissutissanik ujartuinissamut suliakkerneqarpoq, tamannalu aggustip 25-anni Aningaasaqarnermut Ataatsimiititaliamut saqqummiunneqassaaq.
-Sukannersumik ingerlatsinissap ukiup sinnerani ingerlanneqarnissaa allaqqunneqarsinnaanngilaq, taamaaliunngikkuttami aappaagu aningaasaqarnitsinnut aamma sunniuteqarnerluttussaavoq. Taamaammat Aningaasaqarnermut Ingerlatsiviup ingerlatsiviillu allat suleqatigiillutik aaqqissuteqarnissamut siunnersuuteqarnissaat neriuuteqarfigilluarpara, Stine Egede oqarpoq.