Meeraanitsinniit akisussaaqataanermik ilinniartinneqartarnerput angajoqqaatsinnit perorsaasorisatsinniillu piumasaqaataasartoq siunissamut toqqammaviliisut pingaaruteqarluartut ilagaat, tamanna tamatta kinguaatsinnut ingerlateqqittuartariaqarparput.
Asasakka meeqqat, ullumi FN-ip nunarsuaq tamakkerlugu meeqqat ullorititaani ullorsiornissinni pilluangaaritsi.
Meeqqat tamarmik toqqissisimanartumik peroriartornissaat inersimasut tamatta akisussaaffigaarput.
Meeqqat angerlarsimaffimminni toqqissisimassapput, nerisassaqarlutillu atisassaqassapput, qasuerlutik sinissimallutik meeqqerivinnukarlutillu atuariartassapput, taquaqartassapput, minnerunngitsumillu peqqissumik inuuneqarnissamut aqqutissiuunneqassapput; soorlu skærmip saavani uninngaannarani timip aalatinnissaanut aamma kigutit paarilluarnissaannut.
Meeqqat pisinnaatitaaffiinik angajoqqaat qulakkeerinninnissaminnut pisussaatitaapput, tamannali naammassineqarsinnaanngikkaangat inuiaqatigiit ikioqatigiilluta meeqqat pisinnaatitaaffiinik qulakkeerinninniarluta pisortaniit meeqqanut angajoqqaavinullu pisariaqartitsisunut ikiuiniarsinnaasarpugut. Pingaaruteqarpormi tamaavitta inuunerissaarnissarput.
Taamaammat pisinnaatitaaffigisasi pillugit eqqaamassavarsi isumassinnik ataqqineqarnissarsi pisinnaatitaaffigigassiuk, oqarsinnaatitaagassilu.
Tamannali paasineqassanngilaq meeqqat angajoqqaamik piumasaannik perorsaanermillu aallaaveqartunik qimarratiginninnissaat.
Angajoqqaassimi perornissarsi eqqarsaatigalugu siunissami akisussaaffimmik tiguseqqinnissassinnut ilinniartitsinissamik pisussaaffeqarput, piumasaqaateqarfigineqarnerlu ikioqatigiinnermik pilersitisartoq siunissami nammineerlusi ingerlalernissassinnut iluaqutigissavarsi.
Taamaammat oqaaqqissaarutit piumasaqaatillu taamaattut ilaanni nuannernerpaasanngikkaluartut akisussaaffimmik tiguseqataallusi peqataaffigisassavasi, siunissami iluaqutigissagassigit.
Taamaakkaluartoq meeqqatut pisinnaatitaaffissi atorlugu aamma meeraqatisi peqatigalugit nuannisaqatigiittarnissarsi inissaqartittassavarsi; Timersornikkut, timimillu aalatitsilluni pinnguaqatigiinnikkut, aamma pinngortitami atorluaanikkut ataatsimoornerni.
Kommunalbestyrelsimi pisinnaatitaaffigisassi qulakkeerneqarnissaat aamma pitsaasumik avataangiiseqarnissarsi pillugu Inuit Ataqatigiinniit ukiuni tulliuttuni siuttuulluta sulissaagut.
Matumani atuarfinni pitsanngorsaaqqinneq, meeqqat atuarfiini nerisaqartitsinerup eqqunneqarnissaa, meeqqanit sullissisut ilinniarsimasuunissaat, Narsami Nanortalimmilu meeqqeriviliornissaq aamma nunaqarfinni savaateqarfinnilu meeqqat angajoqqaaminni sivisunerpaamik angerlarsimaannarnissaat ilaatigut anguniagaralugit suliniutigaagut.
Qinikkalli innuttaasullu tamatta akisussaaqatigiinnerput, akisussaaffimmillu tigusinissamik ilinniartinneqarnissamik pisussaaffeqarnerput eqqaamassavarput.
Asasakka meeqqat, angajoqqaallu najuuttut taama oqaaseqarlunga – meeqqat ulluanni pilluaqqoqqippassi, neriuppunga ulloq manna ullorsioqatigiillusi nuannisarfigikuloorumaarissi.
Stine Egede, Kommune Kujallermi borgmesteri