Qinersinerup kingorna qinikkat nutaarpassuit isaapput, kommunerujussuanngornerullu kingorna kommunetsinni siuttoqarnikkut perngaammik nikittoqarluni.
Qinikkat nutaat majip aallaqqaataani ivertinneqarput, suliassaminnullu issiavik ingiffigisartik pulaffigiartuaaleruttorpaat. Taamatuttaaq Borgmesterinngortup akisussaaffik annertooq tigusani pulaffigilluariartorlugu.
Maajip 17-iani 18-ianilu qinikkat pikkorissarneqarput, ullut imartuut qinikkanullu paasissutissiiffiulluartut, Kommunemi atorfilinniit, Nunamullu Namminermut Naalakkersuisoqarfimmiit aallarniutigineqarput. Maajillu 19-ani Kommunalbestyrelsemi ataatsimiinneq siulleq ingerlanneqarluni.
Ataatsimiinneq siulleq 19 maj ingerlanneqarmat qinikkat periarfissaqarsimanngillat oqaluuserisassanngortitsinissaminnik, oqaluuserisassanngortitsinissaq ataatsimiinissaq sioqqullugu ullunut 21-nut killeqartinneqarmat. Tamannalu pissuteqarpoq oqaluuserisassanngortinneqartoq nutserneqartussaammat kiisalu allaffissornikkut suliarineqaqqaartussaammata.
Inuit Ataqatigiinniit allannguerusunnerput pimoorupparput, tamannalu pissaaq pisortaqarniarnikkut unammillernartut aaqqitassat aaqqissuunneqareerpata. Kommune Kujalleq arlariinnik pisortaagallartunik maanna atorfeqartitsivoq, tamanna pissuteqarpoq qinigaaffiup siuliani pisortaqarniarnikkut unamminartut arlallit pisimanerinik suli ulloq manna tikillugu pisortassanik inuttaliisimannginnermik, inuttassarsiornerili maanna ingerlanneqarput.
Inuit Ataqatigiinniit pingaartipparput Allaffissuup pisortassaa pisortaqatigiillu allannguinermi peqataatsissallugit. Akisussaaffik tigusarput imaanaanngitsussaasoq ilisimareeraluarlugu aningaasatigut aamma ukioq imaasiinnartoq unammillernartumut inissereersimasoq iserfigaarput, tamannalu piaartumik ataatsimiisitaliakkaartumik iliuuseqarfigineqassasoq kommunalbestyrelsemi ataatsimiinnermi isumaqatigiissutigineqarpoq.
Kommunemi ammasumik suleriaaseqarnissarput aallartillugu aningaasatigut inissisimaneq qaammatit tamaasa nittartakkatsigut malinnaavigineqarsinnaalerpoq, kiisalu innuttaasut ataatsimoorlutik kommunemut akiitsui aamma saqqummiunneqartalerutik. Taamaasiornitsigut innuttaasut piumasut malinnaasinnaalissapput kommunetsinni aningaasaqarneq qanoq ingerlanersoq, neriuutigaarputtaaq innuttaasut akiitsut pillugit eqqumanerulerneranik kinguneqarsinnaassasoq, akilersuinissamullu isumaqatigiissusiornissamut saaffiginnittoqarnerulissasoq.
Kommunalbestyrelsinngortut Kommunitsinni illoqarfiit nunaqarfiillu tamakkerlugit ilisaritsikkiartorlutik angalanissamik pilersaaruteqarput tamannalu pissaaq augustip aallartisimalernerani, ilaasortat pisinnaassut amerlanerpaajunissaat anguniarlugu kinguartitsilaarsimavugut.
Allannguineq ullormiit ullormut sumiluunniit pisinnaaneq ajorpoq, Kommune Kujallermi allannguiniarnerput peqqissaarussamik attanneqarsinnaasumillu suliarineqassasoq pingaaruteqarmat taamak ammasumik ilisimatitsissuteqarluta innuttaasut tamaasa aasarsiorluarnissaannik kissaappagut.
Inuit Ataqatigiit sinnerlugit, Gruppeformand Naja Lund