Meeqqat ulluat 1. juni 2021.
Atuarfeqarnermut, Meeqqeriveqarnermut Nutaaliornermullu ataatsimiitsitaliap siulittaasuatut pinngitsoorumanngilanga, Kommune Kujallermi, Kalaallit Nunaanni nunarsuarmilu meeqqat tamani ittut meeqqat ulluanni, meeqqat tamaasa pilluaqqussallugit.
Meeqqat tamassi meeqqat ulluanni pilluangaaritsi!
Meeqqat inersimasunut atassuteqartuarnissaq pisariaqartitaraat. Inersimasullu meeqqanut isumaginnilluarnissaq, sumiginnaannginnissaq, ataqqinninnissaq asanninnissarlu pisussaaffigaat akisussaaffigalugulu.
Kukkussagunanngilanga, oqassaguma, meeqqamut tunissutit annerpaartaasa ilagigaat, meeqqap imminut naleqartilluni imminullu tatigaluni perorsagaanermini tunngaviligaanissaa.
Imminut naleqartinneq meeqqap imminiunini pillugu, imminut nuannarineraniippoq,
imminut tatigineq meeqqap sapinngisani pillugit, imminut nuannaarutigineraniilluni.
Taamaattumik meeqqat meeqqat ullorsiornissinni ulloq nuannaarlusi, inersimasut peqatigalugit nuannarisassinnik sammisaqarlusi sapinngisannguasilu atorlugit, ikioqatigiillusi ulloq nuannersoq atussagissi kissaappassi. Immaqa iipilitulaarlusi, imaluunniit appelsiina, banani, kage, kakao imaluunniit imeq imaluunniit ammassak panertoq, misseq, kigutaarnat imaluunniit paarnat allaluunniit.
Uagullu inersimasut meeqqat ulluannik nuannersuutitsinissamik suliaqartut meeqqap sapinnginnera meeqqamut misigitittuartarisigu, tamanna meeqqap nammineq isummaminik piginnaanerminillu atuisinnaanngornissaanut nammmineersinnaanngornissaanullu pingaaruteqarluinnarmat. Soorlu aamma taama ipput, imminut ajorisunngunnginnissaq meeqqallu isumaanut iliuusaanullu soqutiginninnissaq, meeqqamut piffissaqarnissaq, perorsaanermi akisussaassuseqarnissaq, nersorinnittarnissaq, maligassaanissaq asannittuunissarlu. Kukkusassaagut. Ajunngilaq, taava ikioqatigiilluta, ilikkariartussaagut.
Naggataatigut ima oqarlunga meeqqat meeqqat ulluanni pilluaqqoqqippassi. Meeqqat meeraqatisi ataqqillugillu mianerisarisigit, ikinngutisilu peqatigilluartarisigit, ikinngutigiinneq nuannersoq ilaqutariittut inuunertut aamma pingaaruteqartigisarmat.
Inussiarnersumik inuulluaqqusillunga.
Bibi Kielsen