Campus Kujallermi Artisk Guidetut ilinniakkaminnik naammassisut juunip aallaqqaataani allagartartaartinneqarneranni borgmester Stine Egede pilluaqqusilluni oqalugiarpoq.
-Ilinniagaqalerlusi allagartaqalertusi sinerissami sumiiffinniit assigiinngitsuneerpusi, tamassilu assigiinngisitaartumik pinngortitamik avatangiiseqarlusi.
Nunarpummi isorartoqisoq assigiinngisitaaqisunillu takornarianit misigisaqarfiulluarsinnaasoq, ilissi maanna misilittagaqarfigilerparsi suliffigilissallugulu, Stine Egede ilinniartunut naammassisunut oqalugiaateqarnermini ilaatigut taama oqarpoq.
Borgmesterip kujataata takornariaqarfissuanngorluni piorsaqqinneqarnissaa eqqaallugu takornarialerisut pisariaqartinneqarluarnerat allagartartaartunut oqariartuutigaa.
-Unescoqarfiunitta saniatigut Savaateqarfinni takornarialerinikkut inerisaasoqassaaq, nunatsinnimi kisiartaalluta kujataani nunaateqarnermik, nersutaateqarnermik allatigullu uumasuuteqarnermik ingerlatsiviunerput nittarsaattariaqarparput.
Qaqortumi mittarfissaq takornariaqarnerulernissamut aammaassisussaq aamma Namminersorlutik oqartussat suleqatigalugit Qaqortumi visitorcentereqalernissaq pilersaarutaasut ilagaat.
Siunissami takornariaqarnikkut siuarsaaqqinnissami assaat ilisimasallit maani kujataani atorfissaqartippagut, taamaattumik neriuppunga siunissami maani aamma sulilluarumaartusi.
Ilinniakkassinnit sakkut pigilikkasi atorluarumaarpasi, ajunngitsunik tamanik kissaassillunga tamassi pilluaqqoqqippassi.