Kommune Kujalliup aningaasaqarnerata killiffia qaammatit tamaasa, tassalu Aningaasaqarnermut Ataatsimiititaliap ataatsimeereernerata kingorna, Kommune Kujalliup nittartagaani saqqummiunneqartalissaaq.
Kommune Kujallermi Kommunalbestyrelse nalinginnaasumik ukiumut sisamariarluni ataatsimiittarpoq. Aningaasaqarnermut Ataatsimiititaliaq, juuli minillugu, qaammatit tamaasa ataatsimiittarpoq, qinigaaffillu nutaamiit qaammatit tamaasa Kommune Kujallermi aningaassaqarnerup inissisimaffiata killiffia nittartakkami www.kujalleq.gl -imi takuneqarsinnaalissaaq.
- Taama aalajangersimavugut Kommune Kujallermi aningaasatigut killiffik, minnerunngitsumik akiitsut qanoq inissisimaneri innuttaasut malinnaaffigisariaqarmassuk, Borgmesteri Stine Egede taama oqarpoq.
Kommune Kujallermi innuttaasut akiitsui nutaatut saqqummiunneqartalissapput, aningaasaqarnermullu killiffik siornatigut ukiumut sisamariarluni kommunip nittartagaatigut paasissutissiissutigineqartarpoq.
Ullumikkut aningaasaqarnerup killiffia
Kommune Kujalleq aningaasaqarnikkut akisussaassuseqartumik eqqortumillu ingerlatsiffiusoq, politikkikkut suliassatut anguniagassatullu pingaartillugit isumaqatigiissutaani allassimavoq. Taamaammat Kommunabestyrelse kingullermik ataatsimiinnermini aningaasaqarneq pisarnertut killiffissiorneqarpoq, taassumalu takutippaa aningaasaqarnikkut sukaterisoqanngippat ukiup naanerani amigaartoorutit 13,5 mio. koruuninik annertussuseqarsinnaasut.
- Immikkoortortaqarfiit tamarmik sukannersumik ingerlatsinissaat piumasaqaatigineqassaaq, naak ingerlatsiviit ilaat ernumananngikkaluartut. Kingunerlunngitsumik aningaasatigut inissiissagutta immikkoortortat tamarmik sukannersumik ingerlatsinissami peqataasariaqarput, borgmesteri Stine Egede oqarpoq, nangillunilu. Assersuutigalugu isumaginnittoqarfik inatsisinik annertuumik malitaqartunik aningaasalersuiffiusarpoq, ilaatigut saneqqukkuminaatsunik. Taamaakkaluartoq allatigut sukaterisariaqarnissaq saneqqunneqarsinnaanngilaq. Taama oqarpoq Kommune Kujallermi borgmesteri Stine Egede.