Nukarlerni akullernilu atuartut alloriarnermi angusaat Narsami pitsaanerpaapput

Kommune Kujallermi meeqqat atuarfiini nukarlerni akullernilu atuartitsissutini ataasiakkaani angusat kingulliit ersersippaat, atuarfiit ilaat angusaqarluartut aammali pitsanngorsagassaqartoq.
Narsami ukiut tallimat matuma siorna nutaarluinnarmik atuarfittaarput, ullumikkullu ilinniartitsisut suleqatigiilluarnermikkut atuartut angusaat qaffariangaatsiartissimavaat.

-Ilinniartitsisut suleqatigiilluartorujussuanngorsimapput, taamatullu atuartut ataasiakkaat killiffiat aallaavigalugu atuartitsineq atuligarput angusatsinnut pitsaasumut peqqutaaqqataavoq, Narsap Atuarfiata pisortaa Bettina Abelsen Hansen oqarpoq.

Angusat qaffariangaatsiarput
Kommune Kujallermi illoqarfinni tamani alloriarnermi tuluttut angusat qaffakkiarrtornerat kigaallanngilaq, tassami illoqarfinni marlunni, tassa Narsami Nanortalimmilu, angusat ukiunut siuliinut sanilliullugit akullerni atuartut agguaqatigiissillugit 2020-mi tamarmik 15 %-inik qaffariaateqarsimapput.
Qaqortumi akullerni atuartut agguaqatigiissillugu 2019-imiit 2020-mut tuluttut angusaat aalaakkaavoq.

Qallunaatut angusaat
Narsami Nanortalimmilu qallunaatut angusat qaffariaateqarput, Qaqortumi nukarlerni akullernilu qallunaatut angusat appariaateqarlutik.
Illoqarfinni tamani ilinniartitsisussaaleqineq angusanik sunniuteqarsinnaasarpoq, Nanortalimmi nukarlerni angusat aamma ilinniartitsisussaaleqinermik peqquteqarput.

- Peqqutit pingaarnersaasa ilagisarpaat ilinniartitsisussaaleqineq, pingaarnertut qallunaatut tuluttullu atuartitsisisinnaasunik amigaateqartarneq. Taassumap saniatigut nukarlerni ukiut marluk vikarimik atuisariaqarsimaneq angusanut 2020-mi kalluaanngaatsiarsimavoq, taama oqarpoq Vivi Kleist Nanortallip atuarfiani pisortaq.

Pitsanngorsaanerilli ingerlapput, Nanortalimmimi atuartup angusatigut ilikkagassai qitiutillugit ilinniartitsisut angajoqqaallu akornanni pitsanngorsaaneq maanna ingerlavoq.

Kalaallisut oqaatsivut
Kujataani illoqarfinni tamani ilinniartitsisut kalaallisut oqaluttut amerlanerugaluartut kalaallisut atuartitsinermi angusat suli pitsanngorsarneqarput. Narsami nukarlerni akullernilu atuartut 2019-imiit 2020-mut agguaqatigiissillugu kalaallisut angusaat qaffariaateqarput, Qaqortumi Nanortalimmilu angusat appariaateqartut. Tamannali sulissutigineqartoq atuarfimmi pisortaq oqarpoq.

-Atuffarissarneq aamma oqaasilerineq qitiusumik ataavartumillu ingerlanneqarnissaat sulissutigineqassaaq, atuartullu ataasiakkaat immikkut pilersaarusiorfigineqartarneri sulissutigineqangaatsiarlutik ingerlareerput, taama oqarpoq Qaqortumi Tasersuup Atuarfiata pisortaa Sarah Rødgaard.

Qaqortumi atuarfik tamaat isigalugu angajoqqaannik suleqatiginninneq annertusarniarlugu maanna Ilinniartitaanermut Aqutsisoqarfik peqatigalugu suliniutit ingerlanneqarput.