Qaqortumi ikuallaaviup iluani eqqaanilu, aamma aqqusineq akimut ikaarlugu containerit akornanni eqqakkanik takussaasoqartarpoq. Eqqakkat taakku takussaaneri immikkoortitereqqaartarnermik pissuteqarpoq, eqqakkammi soorlu nalaasaarfiit, siniffiit assigisaallu iginneqartarput, tamakkuli ikuallanneqannginnerminni suliareqqaarneqartarput.
-Eqqakkat immikkoortiterneqaqqaartarput, soorlu siniffiup nalaasaarfiulluunniit qinnerinik saviminertaannillu ilaqarsimappata tamarmik piiarneqaqqaartarput. Ikuallariaannarnik timitaqaleraanngata aatsaat ikuallanneqarsinnaasarput, taama oqarpoq Teknikkimut Avatangiisinullu Ingerlatsivimmi pisortaq Mike Kristiansen.
Eqqakkat ilaat saviminernik, elektroniskinik, batteriinik, annoraaminermik allanillu ilaqartut tamaasa immikkoortiterlugit suliarineqartarput. Taamaakkaluartorli ikuallatat arsakui suli ikuallakkuminaatsunik ilaqartarput.
-Eqqakkat immikkoortiterlugit ikuallanneqaraanngata arsakui suli saviminernik manngersunillu allanik akoqartarput, taakkuli arsakut immikkut aamma katersorneqartarlutik, Mike Kristiansen oqarpoq.
Eqqakkat angerlarsimaffinninngaanniit igitat poorsuarnut qaqortunut poortorneqarsimasut eqqaavissuarmi katersorneqarsimasut maanna takussaajunnaarput, taakkumi ESANI A/S-imi isumaqatigiissut malillugu nuummut nassiunneqareersimalersut ingerlatsivimmi pisortap oqaatigaa.
-Suliniutigaarput siunissami ESANI suleqatigalugu eqqakkat nuummut nassiunneqartalernissaat, taamaalilluta siulliit nassiuppagut Mike Kristiansen oqarpoq.
Eqqakkat immikkoortiterneqartarneri pisariusinnaasarpoq
Qaqortumi ikuallaavimmi suliaqartut pequtinik igitsisoqartillugu savimernit ikuallakkuminaatsullu allat immikkoortiteqqaartarpaat
Udgivet d. 08. april 2021