Kalaallit Nunaata kujataa savaateqarfiuvoq nersutaateqarfiusoq, annertuumillu nunalerinermik ingerlatsiffiusoq ilinniartoqarfiusorlu. Tamanna tunngavigalugu Nunalerineq pillugu Naalakkersuisut Kommune Kujallerlu nukittorsaallutik aallartittariaqartut Kiista P. Isaksen isumaqarpoq.
- Ullumikkut savaateqarneq pingaarnertut ingerlatsiviuvoq, tunisassiorneq Neqi A/S suleqatigalugu ingerlalluarpoq, nutaaliornissamullu piumassuseqartut tapersersorneqarlutillu ineriartortinneqarnissaannut pitsaasunik sinaakkusiisoqarnissaa qulakkiigassaraarput, taamaalilluni nunalerinerup periarfissiissutai tamakkiisumik piviusunngortissinnaassagatsigit. Taamaammat nunalerineq pillugu qitiusumik allaffissorneq Kommune Kujallermut nuullugu atuisunut qanilaarnerusumik ingerlanneqartariaqarpoq, Kiista P. Isaksen oqarpoq.
Namminersorlutik Qqartussat suliffeqarfiutaannik nussuinissami Nunalerineq pillugu qitiusumik allattoqarfiup kujataaniilernissaanik oqariartuut ukiut arlallit matuma siornali Naalakkersuisuusartunut saqqummiunneqartareerpoq.
-Qitiusumik allaffeqarfiup kujataanut nuunneqarnissaanik oqariartuutigisartagarput ukiuni arlalinni Naalakkersuisuusartunut oqariartuutigisarparput. Maanna piffissanngorpoq tamatuma piviusunngortinnissaa, taamaammat nuannaarutigaara Siumut siulittaasuata suliffeqarfinnik sinerissamut nussuinissamik oqariartuuteqarnera, Kiista P. Isaksen oqarpoq.
Nunalerinermut qitiusumik allaffiup kujataanut nuunneqarnissaanik eqqarsarnerup saniatigut Niuernermik Ilinniarfiup tamakkiisunngorluni kujataanilernissaa inissaminiittoq borgmester Kiista P. Isaksen isumaqarpoq.
-Kujataa ilinniartoqarfissuuvoq, ilinniarnertunngorniarfik, savaatilinngornianut nunalerinermullu ilinniarfik, Inuili aamma Niuernermik IIinniarfik aamma Niuernikkut Ilinniarnertuunngorniarfik HTX kujataaniillutik. Taamaammat suliffeqarfinnik nussuinissami Niuernermik Ilinniarfiup tamakkiisunngorlugu kujataanut nuunneqarnissaa inissaminiippoq. Ilinniarfiimmi imminnut ataqatigiiffeqartut kujataani inissaqartilluarpagut, ukiunimi makkunani Namminersorlutik Oqartussat ilinniartunut inissianik kujataani sanaartortitsileruttorput, taamaammat Nunalerineq pillugu qitiusumik allattoqarfiup ilinniarfiillu kujataanut nuunneqarnissat inissaminiimmat piviusunngortitsiniaanissamut isumalluarpunga, Kiista P. Isaksn naggasiivoq.