Nanortalimmi utoqqaat illuanni helsekabine pigineqalersoq pisortaasimasup suliffimi saniatigut nammineq kajumissutsiminik aningaasaqarfinnut qinnuteqarnermini utoqqaat illuannut periarfisseerusulluni nutaaliornissamillu siunertaqarluni suliaraa.
-NunaFonden-imut qinnuteqarpunga, tassani aningaasartuutit tamakkerlugit aningaasaliissutigineqarput, tikimmallu pedelimit ullut 14-it ingerlaneranni ikkussorneqarpoq. Taama oqarpoq Ungaaq Lundblad Nanortalimmi utoqqaat illuanni septembarimi 2020-miit 2021-mi januaarimut pisortaasimasoq.
Ungaaq Lundbladip nammineq kajumissutsiminik utoqqaat illuanni helsekabinitaarnissaq sulissutigaa, utoqqaallu najugaqartut aninissaminnut periarfissaqarpallaanngitsut timiminnik aalatitsisinnaannissaat kissartumiissinnaannissaallu pingaartillugu.
Helsekabine innarluutilinnut pitsorluttunullu tulluarsagaavoq issiavinnik assakaasulinninnik atuisunut atorneqarsinnaalluni.
Helsekabine utoqqarnit ersigineqaqqaalaarpoq
Massakkut helsekabine utoqqarnit misilinneqarsimalerpoq aalaakkaasumillu inunnit marlunnit sapaatip akunneranut arlaleriarluni atorneqartarpoq.
-Qunugineqaqqaarpoq misilikamikku ajunngikkaluarpoq. Massakkut atuisuusuni ataaseq talimigut anniarneruleraangami iluaqutigisarpaa. Taama oqarpoq Naja-Bette Semsen Isaksen Nanortalimmi utoqqaat illuanni susassaqartitsisoq.
Nanortalimmi Utoqqaat Illuanni helsekabineqalerneq iluaqutigineqarpoq
Helsekabine kissalaarfiusinnaasoq nukinullu iluaqutigineqarsinnaasoq NunaFondenip aningaasaliivigineratigut piviusunngorpoq.
Udgivet d. 30. marts 2021