-Innuttaasut amerliartoqqilernerat siuariarneruvoq isumalluarnartoq
Nunatsinni innuttaasut amerlassusaat naatsorsueqqissaartarfimmit saqqummiunneqartoq
Kommune Kujallermi innuttaasut amerliartoqqilernerannik takutitsivoq.
Ukiut qulit matuma siornatigut aallartittumik kujataani innuttaasut agguaqatigiissillugu ukiut nikittarneranni 100-nik ikilisarput, inukilliartornerli siorna unitsinneqartoq ukioq manna innuttaasut amerleriarsimapput, tamanna borgmesterimit nuannaarutigineqarpoq.
-Qinigaaffik una aallartimmat borgmesteritut akisussaaffik tigullugu kommunalbestyrelsimi ataatsimiinnermi siullermi oqariartuutigivara suliassatta annersaat tassaasoq inukilliartornerup illuanut saatinnissaanut suliuteqartariaqarnerput, maannalu ukiup aappassaani inukilliartorneq unitsissimasarput nuannersumik misigiffigivarput, neriuppungalu siunissami inuttusiartuinnarumaartugut, Kiista P. Isaksen nuannaarutiginnilluni oqarpoq.
Naatsorsueqqissaartarfiup kisitsisini saqqummiussaani Kommune Kujallermi innuttaasut januaarip aallaqaataani 6454-iupput, 2020-mut sanillullugit 15-inik amerleriaateqarlutik.
-Kommunitsinni innuttaasut amerleriarnerat kisitsisinngorlugu immaqa allanit annertugisassaanngikkaluarpoq, anguniagaqarnitsinnili suliniutigisatsinnik iluatsitaqarsimagatta innuttaasut ukiuni arlalinni ikiliartorsimagaluarnerat illuanut saatillugu innuttaasut amerliartorteqqilerpagut, taamaammat pinngitsoorusunngilanga kommunalbestyrelsimi ilaasortaqatinnut minnerunngitsumillu kommunitsinni innuttaasunut ineriartorniarnermik siunnerfeqarnitsinni kivitseqataasunut qujassallunga, ineriartornerup taama ingerlaannarnissaanut siunissamut neriulluarpunga, Kiista P. Isaksen qujamasulluni naggasiivoq.