Suliffeqarfik eqqagassaleriffiusoq ESANI A/S 2019-imi pilersinneqarpoq, tassaniippullu pisortaq siulersuisullu, kommunillu peqataatitaqartut ilaasortaapput.
ESANI A/S-ip pingaarnertut siunertaraa nunatsinni eqqagassanik sunilluunniit passussinermi aaqqiissutissanik pilersitsinissaq. Tamatuma kingunerisaanik ikuallaavinnik marlunnik aammalu uuliakumik katersivinnik sanatitsisoqassaaq.
Peqatigitillugu nunatsinni illoqarfinnut nunaqarfinnullu tamanut aallertarnermut aaqqissuussisoqassaaq, taamaasillutik eqqagassat ikuallajasut nunaqarfinneersut illoqarfinneersullu Sisimiunut Nuummullu nassiunneqartarniassammata. Tassa imaappoq Kommune Kujallermi illoqarfinni nunaqarfinnilu eqqagassat poortorneqarlutik Nuummut siunissami nassiussuunneqartalissapput.
Eqqagassat allat Nunatsinni avataanulluunniit sumiiffinnut allanut passunneqarfissaannut nassiunneqartassapput.
Ikuallaaviit nutaat marluk Sisimiuni Nuummilu inissisimassapput, uuliakumillu katersiviit pilersaarut naapertorlugu Qaqortumi, Aasianni Maniitsumilu inissisimassallutik.
Ikuallaavinni nutaani eqqakkat 53 tonsit ulloq unnuarlugu ikuallanneqarsinnaassapput. Assersuutigalugu Nuummi ikuallaavik ulloq unnuarlu eqqakkanik 40 tonsinik ikuallaasinnaavoq.
Aallaqqaammut Kommune Kujalliup eqqakkat ikuallassinnaasut umiarsuakkut Sisimiunut nassiuttartussaassavai, Sisimiunilu piareersarneqaleruttorpoq eqqakkanik utaqqiisaagallartumik inissiivissaq (affaldshotel) aammalu ikuallaavissaq Nuummiit siulliulluni naammassineqartussatut pilersaarutaalluni.
Pissutsit assiginngitsut peqqutaallutik assartuinissamut pilersaarutit kinguartooqqagallarput, kisiannili eqqakkanik nassitsiortortarnerit uani qaammammi ilaatigut Qaqortup illoqarfianiit misiliutaasumik aallartisarneqaleriissallutik.
Ataqatigiissaarineq qularnaatsumik ingerlaleriarpat naatsersuutigineqarpoq qaammammut ataasiarluni eqqakkanik ikuallajasunik umiarsualiinikkut ESANI A/S-ip aallertitsisarnissaa aallartissinnanngussasoq.
ESANI A/S sunaana?
Nunatsinni kommunit sisamaasut isumaqatigiissuteqarput kommunini ataatsimoortumik eqqagassaleriffeqalissasoq, tassuunalu avatangiisit eqqarsaatigalugit siunissami eqqagassat eqqortumik passunneqartalernissaat qulakkeerneqassasoq.
Udgivet d. 17. marts 2021