Maanna aalisariut Ilivileq Hafnafjordur-imi pitoqqavoq, Naalakkersuisut immikkut ittumik tulaassisussaatitaanermut piumasaqaateqaleriasaarneranni soriarsinnaanani.
Tamaanna Kommune Kujallermut suliffeqarfimmullu kinguneqarnerlussinnaammat borgmester Kiista P. Isaksen aamma inuussutissarsiornermut suliffeqarnermullu ataatsimiititaliami siulittaasoq ullaaq manna Naalakkersuisumut allagaqarput.
-Pisoq ilungersunartutut isigaarput, taammaattumik Naalakkersuisunit iliuuseqapallattoqarnissaa neriuutigalugu allagaqarpugut. Iliiuseqartoqanngippammi suliffippassuit annaaneqassapput. Tamanna aarlerinarpoq, Nanortalimmimi inuussutissarsiut ingerlanneqarluartoq unitsiinnarneqassappat illoqarfiup uummataa qaminneqassaaq, aamma Qaqortumi Narsamilu suliffiit annaaneqassapput, taamaattumik Naalakkersuisut iliuuseqapallattariaqarput. Taakkuuppummi suliffissaqartitsiniarnermi qulakkeerinneqataasussat, borgmester Kiista P. Isaksenip oqarpoq.
Nanortalimmi Narsami Qaqortumili tunisassiorfinni inuit 40-50-it akornaniittut ukioq kaajallallugu suliffeqartuupput, taakku saniatigut APF-ip kilisaataataanni inuit 100-it missaaniittut amerlanersaat kommune Kujallermut akileraartartuupput.
-Sulisut akileerarutaat annertoorujussuarmik Kommune Kujallermi isertitsissutigisarpagut, maannalu killiffimmi ilungersunartumi Naalakkersuisut iliiuseqapallannianngippata akileraarutitigut isertitarisartakkagut annaassavagut. Matumani ilaqutariippassuit imminnut pilersortut isertitaarutsinneqarsinnaanerat kommunimiit ilungersunartutut isigaarput, ikiorsiissutinimmi pilersuilernikkut inunnik isumaginninnermi aningaasartuutissat qaffattussaapput, Simon simonsen
Artic Prime Fisheriesip Naalakkersuisunit aporfilersorneqarluni usigiarsinnaanngikkallarpoq, tamanna allanngortinneqanngippat nunami suliffinnut suliffeqarfimmullu kingunerlussinnaasoq borgmester Kiista P. Isaksen aamma Simon Simonsen aarlerissuteqarput.
-Taamaattumik kommunitsinniit kissaatigaarput pisoq pillugu piaarnerpaamik Naalakkersuisunit aaqqiissuteqartoqartariaqartoq; Naalakkersuisoqatigiimmi maanna inissisimaffianni aallanngortoqariaannaavoq, suliarlu piaartumik qisuariarfigineqanngippat suliffeqarfimmut kommunitsinnullu annertuumik kingunerluttussaavoq, Kiista P. Isaksen naggasiivoq.