Qaqortumi pinaveersaartitsinermik ataatsimiititaliap meeqqat 13-it inorlugit ukiullit unnukkut arfineq pingasunut aamma inuusuttuaqqat 13-iniit 16-inut ukiullit unnukkut qulinut angerlareersimasarnissaat kaammattuutigaa.
Killiliunneqartup kingorna meeqqat aneertut unnuarissanit naapinneqarlutik oqaloqatigineqarsinnaanngorput. Maannami unnuarissat namminneq kajumissutsiminnik suleqataanermikkut Qaqortup illoqarfiani pinaveersaartitseqataasussanngorput.
-Unnuarissanik nammineq kajumissutsiminnik suleqataarusuttunik pissarsiornerput iluatsilluarpoq, matumani unnuarissat ”Tulukkat Sungaartit” peqatigiiffinngorlutik illoqarfitsinni pinaveersaartitseqataallutik aallartipput, Anna P. Knudsen pitsaaliuinermi siunnersorti oqarpoq.
Tulukkat Sungaartit peqatigiiffittut pilersinneqarnerani illoqarfimmi toqqissisimanissaq pingaarnertut siunertaavoq, matumani akisussaassusilimmik pinaaversaartitseqataanermik ineriartortitseqataaffiusumillu siunertarqartoq.
-Nuannaarutigaara nammineq kajumissutiminnik suleqataarusuttut peqatigiiffimmik aallartitsinermikkut illoqarfimmi angalaartalernissaat piviusunngorsinnaammaat, Tulukkat Sungaartit tallimanngornermi novembarip arfernanni siullermeerlutik illoqarfimmi pisuttuassapput, Anna P. Knudsen oqarpoq.
Peqatigiiffik Tulukkat Sungaartit aallartinneqarneranni siulittaasunngorpoq Therkild Kleist, Mette Petersen tullersortaalluni, Konkordie Jakobsen allatsinngorpoq, Lena Pedersen aamma Inngili Egede aningaaserisunngorput kiisalu Jens-Enok Hansen Naja K. Lyberthilu siulersuisuni ilaasortanngorlutik.