Allaanerusumik aaqqissuussisariaqalerneq Covid-19-i pillugu maleruaqqusanik malinninniarnermik aallaaveqarpoq, silamimi aaqqissussat inunnik 250-it sinnerlugit peqataaffigineqartussat ingerlanneqarsinnaanngillat, kommuniniillu allanit peqataasoqassappat inuit ikinnerusussaapput. Mianersorluta nalliuttut atorumaarigut Borgmester Kiista P. Isaksen kaammattuuteqarpoq.
-Sapaassuarmi illoqarfiup orpiata ikinneqarnissaa qilanaarisartakkama ilagaat, inuppassuimmi ataatsimoorlutik juullimut ullut nalliuttut aallartittagaat najuuffigalugu pilluarnarisaqigakku. Juullip tungaanut ilaquttagut/qanigisagut avataniit tikerartarput, ullullu makku atukkagut pillugit sanngiinnerusortagut utoqqartagullu eqqarsaatigalugit mianersortariaqarpugut, taamaammat illoqarfittatsinni ataatsimoorluta orpimmik ikitsinata sapaassuarmi orpik ikereersimasoq ulloq aallartissavarput, Kiista P. Isaksen oqarpoq.
Nanortalimmi, Qaqortumi Narsamilu illoqarfiup orpii ullaakkut nalunaaqutaq arfinermut ikinneqassapput, ualikkullu nalunaaqutaq pingasunut illoqarfinni tamani juullip inua biilinik angalaarumaarpoq. Ualikkut nalunaaqutaq sisamanut Kommune Kujalliup facebookimi quppernerani aamma Seekon Radiomi juullerpalaartumik isiginnaagassaqarlunilu tusarnaagassaqassaaq.
-Inuiattut ullorsiornitsinni digitaliusumik aaqqissuussilluta isiginnaagassamik suliaqarnikuuvugut, maannalu aammarluta sapaassuarmi aallakaatitassammik juullerpalaartumik suliaqarluta aallarteruttorluta. Borgmester Kiista P. Isaksen oqaaseqarumaarpoq, orpik ikinneqassaaq, erinarsoqatigiit meeqqallu juullisiutinik tussiartut, juullimullu pilluaqqussuteqartut isiginnaarneqarsinnaajumaarput, Kultureqarnermut ingerlatsivimmi pisortaq Mikael Mansi Rasmussen oqarpoq.
Orpiup ikinneranut atatillugu meeqqat pinnattaarisartagaat ukioq manna meeqqerivinni atuarfinnilu novemberip 27-anni agguaanneqassapput. Inoorlaanut meeqqerivimmiittuunngitsunullu kiisalu meeqqanut tikeraanut atuarfimmiittuunngitsunut ulloq taanna Kultureqarnermut Sunngiffimmilu Immikkoortortaqarfimmut aallertoqarsinnaajumaarpoq.
Kommune Kujallermi nunaqarfinni tamani orpimmik ikitsineq pisarnertut ingerlanneqassaaq.