Juullip tungaanut nalliuttuni allatuulli meeraanermiit eqqaamasat maanna utoqqanngortunit ilaatigullu akornatsinniikkunnaarsimasunit asanninnermik kialaarnermillu tipaatsuffiullutik misigitinneqartartut eqqarsaatinniipput.
Qujamasuutigingaarparalu ilitsoqqussaq uummatitsinni tunissutaasoq kinguaariinniit kinguariinnut ingerlateqqinneqartuartoq meerartatsinnut ingerlateqqillugu ukiumi taarsiorfigisatsinni ataatsimoorluta qaammaqqutissatsinnik ikititerinerput.
Ukioq manna nunaqarfittatsinni pisarneq malillugu ataatsimoorlutik sapaassuarmi orpimmik ikitsisut eqqaamaqaakka.
illoqarfittatsinni allatut aaqqissuussisariaqarnitsinni orpik ikereersoq sapaassuaq iterfigaarput, tamannalu pisarnermit allaanerugaluartoq orpiup qaamanermik tunisinera nuannaarnermik neriunnermillu tunisiumaartoq neriuutigingaarpara.
Orpiit illoqarfittatta Danmarkimi illoqarfittut ikingutigisaanniit tunissutaasut kusanangaarlutillu ikinneqartut periarfissaq manna iluatsillugu kommunalbestyrelse sinnerlugu tunissuteqartunut qujarusuppunga.
Ukiunimi arlaqalersuni ileqqoq tanna innuttaasunut nuannaarnermik misigititsisarpoq.
Nammineerlunga ukiut tamaasa orpiup ikinneqarnissaanut ataatsimoorluni ikitseqatiigiinnissaq qilanaarisarpara, ullunili makkunani atukkatsinni Covid-19 pillugu Naalakkersuisut peqqussutaat malittariaqakkagut allaqqunneqarsinnaanngimmata aalajangernermik imaannaanngitsumik Kommune Kujallermi aaliangiussisariaqarsimavugut.
Tamanna sanngiinnerusortatta utoqqartattalu eqqorneqannginnissaannik, aammalu Covid-19-mik tuniluuttoqalinnginnissaanut innuttaasunik paarsineruvoq, taamaattumik ulluni makkunani immitsinnut paarilluarnissarput kaammattuutigerusuppara.
Nanortalimmi, Qaqortumi Narsamilu orpik pisarneq malillugu ikinneqanngikkaluartoq juullip inuata angalaarnera meeqqanit nuannaarutaalluni misisaqarfiulluarnisaa neriuutigingaarpara.
Ukioq manna allatut aaqqissuussinitsinni misigisaq allaanerungaaraluartoq nalliuttut aallartinneranni misigissutsit taakkuupput.
Asanninnerujussuarmi ilaqutariittut ataatsimoornissamut qilanaarneq pigineqarpoq, ilaqarpugulli asasaminnik maqaasisaqarlutik uummammioqartunik.
Juullip ulluini nalliuttunilu ajunngitsuliortarneq asanninnerlu pigisarput tullitsinnut misigitittaritigutoq, ikioqatigiinnitsigummi meerartatsinniit utoqqartatsinnut nuannaarnermik tunissuteqarneq qamuuna pisuunguutigissagatsigu.
Nunaqqatikka asasaminnik qimagaasimasut, juullip tungaanut maqaasisaqarlutik uummammioqartut, asanninnerullu pianik qullilisut misiginneqatigingaarpakka; qanortoq asanninnermik nukissaqartitaallutik asasaminnillu najorneqarlutik juullip tipaatsunnartuanik misigitinneqarilik.
Qanoq misigisimagaluarutta sumiluunniit juulli ataasiusutut oqaatiginiarneqartarnera upperilluinnarpara, eqqaamagitigulu juulli tunissutissanik akisuunik aallaaveqanngimmat, asanninnermilli tunisineq tipaatsunnermik misigiffiusarmat.
Meerartagut paaralugit juullip tungaanut ingerlaqatigiinnissarput juullimut kissaatima annersaraat; tamannguassi juullisiorluarnissassinnik kissaallusi sapaassuarmi qamannga pisumik pilluaqqungaarpassi.
Kiista P. Isaksen
Kommune Kujallermi borgmesteri
Asasakka Kommune Kujallermi innuttaaqatikka minnerunngitsumillu nunaqqatigut, tamannguassi sapaassuarmi pilluangaaritsi.
Ullumi sapaassuarmi juullimut ullut nalliuttut aallartillugit angerlarsimaffippassuarni igalaani ullorissat ukiup taarnerani qaamanermik kialaamillu tunisisut ikinneqarput.
Udgivet d. 30. november 2020