Utoqqaat illuanni pisortanngorlaaq: Nutaaliorluni eqaannerusumik ingerlatsineq atornerusariaqarparput

Ungaaq Lundblad Nanortalimmi utoqqaat illuanni pisortanngoqqammertoq nutaamik eqqarsarluni ingerlatsinermik misileraaleruttorpoq.

-Nammineq kajumissutinnik suliaqarnissamik nuannarisaqarpunga, tamannalu pisortatut sulininni misilerarlugu aallarteruttorlunga. Isumaqarpungalu tamanna suliffeqarfimmut pitsaasuusoq, suliammi nuannaarutaasut takussutissaqaleraangata nuannersumik misiginartarpoq, Ungaaq Lundblad oqaluttuarpoq.

Nanortalimmi utoqqaat illuanni najugaqartut Pilersuisoq aamma aalisakkerivik aningaasaliisoralugit inuinnaallu namminneq piliaminnik tunissuteqarneratigut kalaaliminerpassuarnik nerersuaartinneqaqqammerput, aaqqissuussarlu taanna Ungaaq Lundbladip igasoq Henrik Poulsen aamma Erneeraq Efraimsen peqatigalugit namminneq kajumissutsiminnik suliaqarnermikkut aqqissuuppaat.

-Utoqqaat illuanniit piniartortatsinnut kalaaliminersiniarneq ajornaatsuinnaaneq ajorpoq, taamaammat nutaamik eqqarsarlunga aningaasaleerusuttunik tunissuteqarusuttunillu ujartuivunga, tamannalu iluatsilluarmat kalaaliminerpassuarnik utoqqaat sassaallerfigineqarput. Aaqqissuussinerup utoqqarnit nuannaarutigilluarneqarnera inuttut pissarsinaqaaq nuannerlunilu, Ungaaq Lundblad oqaluttuarpoq.

Nammineq kajumissutsimik suliaqarnermi allamik nuannaartitsisinnaaneq pissarsinartarmat Ungaaq Lundblad isumaqarpoq nutaaliorluni suliffiup iluani eqaatsumik ingerlatsisinnaaneq misilerarnerusariaqartoq.

-Nammineq kajumissutimik suliaqarluni eqaatsumik nutaamillu eqqarsarluni ingerlatsinissamik misileraanissaq suliffeqarfinnut allanut innersuukkusunnarpoq, matumani aamma sulisorisanik qanimut peqataatitsinikkut, tamannami sulisunut sullitanullu tamanut nuannersumik misigiffiusarpoq, Ungaaq Lundblad oqarpoq.

Utoqqaat illuanni utoqqaat kalaaliminernik nerersuaarnissaannut suliniutip kingorna suliniut nutaaq Ungaap suliaralugu aallartereerpaa, tassalu najugaqartut amiginnerulernissaannut suliniut.

-Utoqqaat najugaqartut ilaat arlaatigut amerluuteqartarput, ilisimavaralu amerluuteqartut helsekabinartarneq iluaqutigisaraat. Taamaammat aningaasaateqarfinnut qinnuteqarnerit aqqutigalugit utoqqaat illuanni utoqqaat helsekabinemik peqalernissaat suliniutigalugu aallartereerpara, tamannami utoqqaat arlalerpassuartigut iluaqutigisinnaavaat, Ungaaq Lundblad oqarpoq.