Sermitsiaq uge 40-mi saqqummersumi Erik Nørskovip allagaanut Kommune Kujallermi borgmester Kiista P. Isaksenip akissutaa: "Unneqqarissumik ingerlatsisoqarpoq!"

Kommunemimi ingerlatsineq inatsisit malillugit ingerlavoq, unneqqarissumillu ingerlatsisoqarpoq.
Taamaattumik erseqqissatigissavara kommunimi aqutsisutut eqqasuutissaqannginnatta.

Ukiup aallartisimalaaginnarneraniilli Qaqortumi eqimattat akerliussutimik takutitsisut arlaleriarluta kommunitta silataani naapittarpagut. Oqariartuutigineqartullu tusarnaartarpagut, naapeqatigiinnissamullu aamma ammalluta oqariaartuuteqarfigisarlugit.

Akerliussutsimilli takutitsinerit annertuumik kommunimi ingerlatsineq pillugu tusatsiakkat aallaavigalugit pasilliutinik imaqartarput, matumani Komuunimi pisortaanerup tullianut Carsten F. Hansenimut annertuumik pasilliutaallutik.

Tamatuma malitsigisaanik Qaqortumi Inuussutissarsiortut aamma kommunimi ingerlatsivinni pisortaasut arfinillit pisortaanerup tullianut pasilliutaasut pillugit iternga tikillugu misissuisoqartariaqarneranik kaammattuuteqarput. Tamanna piffissami matumani kommunimi pisortaanitta Kim Dahlip naammagittaalliutaasut eqqartuussissuserisunut
kukkunersiuisunullu misissugassanngorlugit suliakkiivoq.

Eqqartuussissuserisut kukkunersiuisullu misissuinerata inerneraa pasilliutaasut inatsisaatsuliornerunngitsut, taammattumik Erik Nørskovip allakkiamini saqqummiussaanut tunngavissaqanngilanga naammagittaalliutaasoq pillugu aallaqqaataanik misissuititseqqinnissamut, misissuititsinermi inernilerneqarluni naammassereermat.

Misissuititsineq misissuititsinerullu inernera kommunalbestyrelsemi ilaasortanut saqqummiunneqarnikuuvoq, taamaattumik eqqortuunngilaq kommunimi ilaasortat ilisimatinneqarsimannginnerannik oqariartuuteqartoqarnera.

Matumanilu erseqqissaatigissavara kommunimi ingerlatsivinni pisortaasut marluk tusagassiorfiit aqqutigalugit allakkatigut naammagittaalliuuteqartutut saqqummiussisoqarnissaanik peqataatinneqarnerminnut ilisimasaqanngitsut paasitinneqarsimmanngitsulluunnit ilisimagakku, assorujussuaq tupigusuutigalugu allakkamik taamaattumik saqqummiussisoqarnera.

Kommune Kujallermi sulisutta toqqissisimallutik sulisinnaanissaat pingaartilluinnarparput, taammaattumik matumunnga qulakkeerinneqataasussamik whistleblowerimik aaqqissuussaq ukioq manna atuutilertoq suliffeqarfitsinni atulernikuaarput. Unneqqarissumimmi ingerlatinissarput pingaartilluinnarparput.

Ukiuni makkunani kommunimi kommunalbestyrelsemit innuttaasut pitsaanerpaamik sullinneqarnissaaat, minnerunngitsumillu kommunitta ineriartornissaa aallaavigalugit sukataaruteqarluta sulivugut.

Suliniutigullu arlalitsigut iluatsiffeqarmata ukiuni arlalinni kujataani inuerukkiartuinnavissimaneq ukioq manna unitsipparput, innuttaasut inuussutissarsiuteqartullu qanimut peqataatillugit suli amerliartuinnarnissarput annertuumik suliniutigaarput.

Aap, pitsanngorsaajuarnissaq isikkivigalugu suliniuteqarpugut. Uggoreqaarali pissutsit siumut ingerlasut isiginagit, tusatsiakkat paasissutissat eqqortuunngitsut aamma inunnik ataasiakkaanik malersuinerit aallavigalugit kommunerput ajorluinnartumik inissisimasutut inissillugu avammut nittarsaassisarneq nalaattaratsigut.

Tamanna inissaqartipparput, inuilli avataaniit kujaataanut nuunnissaminnik eqqarsaatersuuteqartaraluartut amerlasuut isumaqalersinneqartarput pissutit ajorluinnartumik inissisimasut. Isumaqarpunga suliniutit iluatsittut aamma taama nipituuliuutigineqarnerususinnaagaluartut, tamannami kommunimut, innuttaasunut, inuussutissarsiortunullu tamanut peqqinnarneruvoq.

Innuttaasut peqatigalugit kujataata najoruminartuunissaa suliniutigaarput, oqaatigeqqissavaralu kommunitsinni inatsisit malillugit unneqarissumik ingerlatsisoqarmat.