Otto Motzfeldt ullorsiutinik naqiterititsisarpoq, ullorsiutillu tuniniarnerini sinneqartoorutit meeqqanut assigiinngitsutigut tunissutigisarpai. Siusinnerusukkut Kommune Kujallermi meeqqanut arsanik, kommunip ilisarnaataanik nalunaaqqutsikkanik tunissuteqareernikuuvoq, maannalu aammaarluni meeqqanut nunaqarfimmi najugaqartunut atuakkanik tunissuteqaqqippoq.
-Nuannaarutigaara qujamasuutigalugulu Ottop suliniuteqartarnermini Kommune Kujallermi meerartatsinnut nuannaarutissiilluni tunissuteqartarnera. Inuimmi nammineq kajumissutsiminnik suliaqarlutik tunniuttagaat kommunitsinnut isumaqartaqaat. Taamaammat pinngitsoorusunngilanga Ottop ajunngitsuliorneranut kommunalbestyrelse sinnerlugu qamanngavik qutsavigissallugu, borgmester Kiista P. Isaksen tunissuteqartumut qujamasoqisoq oqarpoq.
Atuakkat meeqqanut nunaqarfinni najugaqartunut agguaanneqartussat Otto Motzfeldtip nammineerluni apuukkusussimagaluarpai, Covid-19-imilli peqquteqartumik angalasinnaanissaa killeqarmat, atuakkat tunniunneqartut borgmester Kiista P. Isaksenip nunaqarfinnut angalanini iluatsillugu tunissutigineqartut meeqqanut apuuppai.
-Nuannaarutigaara atuakkat tigulluarneqarnerat, atuakkallu Kiistap agguaassinnaammagit tulluusimaarutigalugu nuannaarutigaara, Otto Motzfeldt qujamasulluni oqarpoq.