Piffissami kingullermi kinguaassiutitigut innimiiilliorfigitittarneq tusagassiutini inuillu attaveqaqatigiittarfiini oqallisaangaatsiartoq eqqartorneqarnerusariaqarmat Kommune Kujalleq tapersiilluni KNR-ip inuiaqatigiinni kinguaassiutitigut innimmiilliorfigittarneq pillugu misissuineranut peqataavoq.
-Qujamasunnarpoq piffissami kingullermi kinguaassiutitigut innimiilliorfigitittarneq pillugu oqallinnerit ingerlanneqalernerat, paqumiginagumi oqalliseqataaffigisariaqarparput taamaalilluni inuiaqatigiit akornanni kinguaassiutitigut innimiilliorfigitittarnerit ataatsimoorluta annikillisaavigisinnaagatsigit. Tamanna Kommunitsinniit peqataaffigivarput, inatsisinimmi atuuttunik unioqqutitsinnginnissaq tamanit pingaarnerpaavoq, Kommune Kujallermi borgmesteri Kiista P. Isaksen oqarpoq.
Kommune Kujallermi sulisut inatsisaatsuliornermik pasitsaassaqartoqartillugu eqqunngitsumik pineqarsimanermi unnerluussiffigisinnaasaannik whistleblowerimik aaqqissuussaq upernaaq atorneqalerpoq, tamanna sulisut toqqissisimallutik sulinissaannut, inatsisillu tunngaviusut malillugit ingerlatsinermut qulakkeerinneqataavoq.
-Kinguaassiutitigut innimiilliortarneq akuerineqarsinnaanngilaq, tamanna aamma suliffeqarfitsinni taamaappoq. Taamaattumik sulisugut kinguaassiutitigut innimiilliorfigineqarunik immikkoortortaminni aqutsisuminnut imaluunniit whistleblowerimik aaqqissuussaq atorlugu nalunaaruteqarnissaannut kaammattuuteqarfiginikuaagut. Kinguaassiuutitsigummi innimiilliorfigitittarneq suliffeqarfitsinni atorneqassanngilaq akuersaanngilarpullu, Kommune Kujallermi pisortaanerugallartoq Dorthe Bidstup oqarpoq nangillunilu.
-Kinguaassiutitigut innimiilliorfigitittarneq Kommune Kujallermi akuerineqarsinnaanngimmat taama pisoqarsimatillugu paasissutissat piviusut inatsisillu sinaakkutaasut aallaavigalugit suliaq ingerlanneqartassaaq.