Augustip qaammataani Kommune Kujallermi ilinniartitsisut arlallit peqataaffigisaannik piujuartitsinissaq pillugu nunarsuarmiut anguniagai pillugit (Aktion verdensmål) atuartitseriaatsimik pikkorissaasoqarpoq.
Pikkorissarnermi pissarsiarineqartut atuartitsissutigineqarlutik atorluarneqalereerput, maannalu Kommune Kujallermi meeqqat atuarfiini tamani atuartut nunarsuup paarinissaata pingaaruteqassusaanik oktoberip ingerlanerani sammisaqartinneqarlutik atuartinneqartussanngorput.
- Nunarsuarmiut anguniagaasa suliniutigineqarnerat aallaavigalugu atuartitseriaaseq pikkorissaassutigineqarnikuusoq atuarfittatsinni atorluarneqalereerpoq. Tamannalu iluatsilluarmat ilinniartitsisut tamakkerlutik maanna sammisaqartitsinissaannut pikkorissarneqarnissaat tullinnguupparput. Neriulluta ilinniartitsisut atuartullu pissarsiaqaatigilluassagaat, Kommune Kujallermi AMN ingerlatsivimmi pisortap tullersortaagallartoq Ruth Jakobsen oqarpoq.
FN-ip piujuartitsinissaq aallaavigalugu anguniagai 17-iusut aallaavigalugit atuartut sammisaqartinneqassapput. Atuartitseriaaserlu atuarfinni assigiinngitsuni misilittarneqalereermat atuartitseriaatsimi matumani atuartup ilikkarusussuseqarnera takussaalluartarpoq, atuartummi paasisassarsiorlutik nutaaliorlutillu misileeraatinneqarlutik atuartinneqartarput.
Sammisaqartinneqarneq
FN-ip piujuartitsinissaq aallaavigalugu an
guniagai 17-iusut allaavigalugit atuartitsinermi misileraanermi atuarfiit ilaasa eqqagassalerineq sammivaat.
Matumani eqqagassat qanoq immikkoortiterneqarnissaat, atoqqiisinnaaneq eqqakkallu qanoq mingutitsisinnaanerannik ilaatigut sammisaqartinneqarlutik. Sammisaqartinneqarnerminni suliffeqarfinnut paasiniaanerit, angajoqqaanut peqataatitsineq, nutaaliorlunilu isumassarsiornerit, sammisaq pillugu paasisassarsiornerit atuartumut ilaatigut misigisassaapput.
-Atuartitseriaseq taanna atuartup annertuumik ilikkarusussuseqalerneranik sunniuteqarsinnaasarpoq, matumanilu angajoqqaat atuarfiullu akornanni suleqatigiinnermik pitsaasumik aamma nassataqartarmat atuartitseriaaseq una sammisaqartitsinermi atorneqartussaq pitsaasutut isigaara. Taamaattumik siunissami taama ingerlatsisarnissarput atuartunit pissarsiaqarfiulluarluni ingerlanneqartarnissaa isumalluarfigaara, Ruth Jakobsen oqarpoq.
Kommune Kujallemi piujuartitsinissamik aallaaveqartumik sammisaqartitsineq oktobarip
13-ianniit 28-at ilanngullugu atuarfinni assigiinngitsuni ingerlanneqassaaq.