Nammineq kajumissutsimik suliaqartartunut aningaasaateqarfik aamma kommunip timersortartunut tapersersuiniarluni aningaasaliissutai qinnuteqarfigineqarsinnaapput.
-Ukioq manna Covid-19 peqqutigalugu timersorluni aaqqissuussinerit assigiinngitsut sinerissami aaqqissuunneqanngitsoorput, taamaattumik maanna Kulturimi immikkoortortaqarfitsinninnganniit kujataani timersoqatigiiffiit kaammattorusuppagut Kommune Kujallermi illoqarfittatsinniit nunaqarfittatsiniillu peqataaffigineqarsinnaasumik unammiuaarnernik aaqqissuussinissaannut, Kommune Kujallermi Kultureqarnermut Ingerlatsivimmi pisortaq Mikael Mansi Rasmussen taama oqarpoq.
Timersoqatigiiffinnut Kommune Kujallermi unammiuaarnernik aaqqissuuserusuttunut aningaasanik qinnuteqartoqartoqarsinnaavoq. Matumani Kommune Kujallermi timersorneq tapersersorniarlugu 500.000 korunit kommunimi qinikkat aningaasaliissutigisimasaat qinnuteqartunut aningaasaliissutaassapput.
Ukiup sinneranut Kujataani timersornikkut aaqqissuussanut ingerlatanut tapiissutit ima annertussuseqarnissaat politikkikkut ataatsimiititalimit akuersissutigineqarpoq; meeqqat 18-it inorlugit ukiullit angalanerannut 100 %, inersimasunut 65 %, utoqqasaanut 50 % kiisalu atuisunut tamanut timersortarfimmik attartornermut 100 %. Ineqarneq nerisaqarnerlu nammineq isumagineqassapput.
Tamatuma saniatigut nammineq kajumissutsiminnik suliaqartartut aningaasaateqarfiat Kommune Kujallermi aaqqissuussinissamut tunngatillugu aamma qinnuteqarfigineqarsinnaavoq.
-Nammineq kajumissutiminnik suliaqartartut kommunitta iluani sumilluunniit aaqqissuussiniarunik aningaasaateqarfimmut qinnuteqarsinnaapput. Erseqqissaatigissavarali aaqqissuussiniarlutik qinnuteqartunut Covid-19-ip tuniluutinngissaanut maleruaqqusat eqqumaffigalugit aaqqissuussinissaat pingaartikkatsigu, Mikael Mansi Rasmussen naggasiivoq.
Timersoqatigiiffiit, peqatigiiffit namminerlu kajumissutsiminnik suliaqartartut qinnuteqaatertik allakkatigut Kultureqarnermut Ingerlatsivimmut nassiussinnaavaat.
Nassiussiffissaq: kultur@kujalleq.gl