Kommune Kujallermi innuttaasut siorna ukiup taamaalineranut sanilliullugu 31-nik amerleriarsimasut Naatsorsueqqissaartarfiup saqqummiussaani takuneqarsinnaavoq, tamanna Kommune Kujallermi borgmesterip nuannaarutigaa, innuttaasullu ineriartornermut peqataarusunnerat qujamasuutigalugu.
-Nuannaarutigeqaara kommunitsinni innuttaasut amerliartornerat, kisitsisimmi saqqummiunneqartut malillugit kommunerput inuttusiartortoq takusinnaallugu tulluusimaarnarlunilu qujamasunnarpoq. Tamanna kommunitsinni ineriartortitsiniarnitsinnut innuttaasut ineriartortitseqataarusunnerannut ersiutaasoq isumaqarpunga, ukiunimi kingullerni kommunalbestyrelsimiit innuttaasunut oqariartuutigiuartarparput ineriartortitsinissatsinni innuttaasut kivitseqataanissat, tamanna kinguneqarluarpoq, Kiista P. Isaksen oqarpoq.
Ukiuni kingullerni arlaqalersuni kujataani innutaasut agguaqatigiisillugu 100-nik ikilisarsimagaluartut maanna assiliaq allanngorluni innuttaasut amerliartoqqilerput, tamanna Kommune Kujallermi ineriartortitseqqinniarnermi Kiista P. Isaksenip isumalluarfigaa.
-Siorna Kujataani qitiusumik mittarfittaarnissaq Inatsartuni akuersissutigineqarmat siumut isigisumik piareersaateqarluta aallartippugut. Matumani ilaatigut suliffeqarfik Innovation South Greenland pilersipparput, inuussutissarsiuteqartut inussutissarsiutinillu nutaanik pilersitsiniartut aqqutissiuukkumallugit, tamanna atorluarneqalereerpoq. Siunissami ornitatsinni innuttaasut suleqataarusussususeqarnerat qujamasuutigaara, neriuppungalu piffissaq ornitarput suli inuttusiartorluta ingerlajumaartugut, innuttaasut nunaqqatigilerumaakkagut tikilluaqqungaarpagut, matumani aamma neriuutigaara kujataamiut angerlakaallutik ineriartortitseqataajumaartut, Kiista P. Isaksen oqarpoq.
Juulip aallaqaataani Kommune Kujallermi innuttaasut 6.458-iupput.