Aasami atuanngiffeqareernerup kingorna meeqqat atuarfianni atuartut atualeqqinnginneranni Kommune Kujallermi ilinniartitsisut immikkut qinikkat pikkorissartinneqassapput.
-Kommune Kujallermi atuarfiit ingerlalluartut, taamatullu atuartut ukiup ingerlanerani atuarnerminni pissarsilluartarnissaat ANM Ingerlatsivimmiit pingaartipparput, taamattumik sakkussanik pissarsiffiusussanik atuarfiit tamarmik trinnini tamanit aallartitaqarlutik pikkorissarnernut peqataanissaat tulluartuutipparput, Ruth Jakobsen Kommune Kujallermi AMN Ingerlatsivimmi pisortap tullersortaagallartoq oqarpoq.
Pikkorissarfigineqartussat assigiinngitsut marluk aggustip aallartinnerani pisussat tassaapput meeqqat pisariaqartitaat aallaavigalugit atuartitsinissamut pikkorissarneq (Ugeskemarevolution) aggustip 3-anniit 5-annut Qaqortumi Sulisartut Højskolianni ingerlanneqartussaq aamma Nutaaliornermut ilinniarneq peqatigitillugu Nunarsuarmiut anguniagaasa suliniutigineqarnerat (Innovationsdidaktik/aktion verdensmål) pillugu pikkorissarnissaq aggustip 5-anniit 7-annut Hotel Qaqortumi ingerlanneqartussaq.
-Ilinniartitsisut pikkorissartinneqartussanngornerminni sakkussanik nutaanik pissarsilluarumaarnerat neriuutigaara, matumani atuartunut atuartitsinermi ilinniartitsisullu akunnerminni suleqatigiilluarnissaannik pitsanngorsaajuarnissaq soqutigisarigatsigu, Ruth Jakobsen Kommune Kujallermi AMN Ingerlatsivimmi pisortap tullersortaagallartoq oqarpoq.
Kommune Kujallermi ilinniartitsisut pikkorissartinneqassapput
Kommune Kujallermi atuarfiit ingerlalluarnissaannut aamma atuartut pissarsilluartarnissaannut sakkussanik nutaanik pissarsisoqarnissaa siunertaralugu ilinniartitsisut pikkorissartinneqassapput.
Udgivet d. 01. august 2020