Kommune Kujallermi borgmester Kiista P. Isaksenip Qaqortumi mittarfiliornissaq pillugu Naalakkersuisunut allagai ammasut

Asasakka Naalakkersuisut

Qaqortumi mittarfittaarnissaq Inatsisartut 2018-imi ukiakkut ataatsimiinneranni akuersissutigineqarmat nuannaarutigeqaarput, mittarfittaassarlu eqqarsaatigalugu kommunitsinni siumut isigisumik piareersaateqarluta aallartilluta.

Piareersarnitsinni suliffeqarfik Innovation South Greenland, inuussutissarsiortunut inuussutissarsiutinillu nutaanik pilersitserusuttunut siunnersuilluni aqqutsissiuussisussaq pilersipparput. Maannamullu takornarialerinermik suliaqartunik, unnuisarfiutilinnik, inuussutissarsiutinillu nutaanik pilersitserusuttunik atorluarneqalereerpoq.

Qaqortumimi mittarfittaarnissaq pillugu inuiaqatigiinnut aningaasatigut sunniutigisinnaasai pillugit nalunaarusiortitsilluta misissuititsinitsinni mittarfiliorneq mittarfittaarnerlu Kommunitsinnut sunniuteqarluartussaasoq inerniliunneqarnikuuvoq, taamaattumik mittarfittaarnissaq mittarfissallu sanaartorneqarluni aallartinnissaa Kommune Kujallermi erinigeqaarput.

Mittarfissap suliarineqarnissaanut tunngatillugu 2019-imi Kalaallit Airportimiit Qaqortumi innuttaasunut ataatsimiisitsinermi saqqummiunneqarpoq, Qaqortup mittarfissaanut suliariummannittussarsiuussisoqareernerani mittarfissami qaartitseqqaarneq juni 2020-mi pilersaarutaasoq. Pilersaarutaasutulli junip qaammataani pisinnaanngimmat augustimi pisussanngorlugu kinguartinneqarpoq.

Tamannali suli pinngilaq, suliariumannittussarsiuussinermimi kikkut mittarfissamik suliarinnittuussanersut suli isumaqatigiissutaanngilaq. Tamanna Inatsisartuni ilaasortap Tillie Martinussenip §37 aqqutigalugu Ilulissani Nuummi Qaqortumilu mittarfiliornissamut tunngatillugu apeqquteqaateqaateqarneranut Naalakkersuisup akissutaani atuarneqarsinnaavoq.

Taamaattumik piffissanngoraluarpoq ulluni makkunani suliarinnittussanut isumaqatigiissuteqarnissap ulluni makkunani pinissaa; Ullunimi makkunani Ilulissani Nuummilu mittarfiliornissamut atatsillugu kinguaattoortussanngorneq tusagassiutini sammineqarpoq.

Qaqortumili mittarfittaarnissap ukiorpakuluuni sulissutigineqarsimasup suliarineqarnissaanut aallartinissamut utaqqeqqissinnaanngilagut.

Taamaattumik Naalakkersuisunut Qaqortumi mittarfissamut suliarinnittussarsiuussinermi suliarinnittussanut piaartumik isumaqatigiissuteqarnissaannik kaammattorusuppakka.

Kujataanimi qitiusumik mittarfittaarnissatsinnut sivisunerusumik utaqqeqqissinnaanngilagut.

Tusarfiginissassinnut qilanaarlunga,

Kiista P. Isaksen
Kommune Kujallermi borgmesteri