Eqqaaniut

Kommune Kujallermi annaavarput inuk toqqissilluni tusarnaarsinnaallunilu pisortaanertut akisussaassuseqarluni sullissisoq.

Qaqortumi Sulinermik Inuussutissarsiuteqartut Peqatigiiffiat “Sinniisoq”-miit tupassutigeqisatsinnik tusarparput maanna inuk suleqatigillualigarput akornatsinniikkunnaartoq.

Ukioq kingulleq nunarsuarmi sulisartut ulluat ( 1 maj ) malunnartillugu katerisimaarnitsinni Qaqortumi Sulinermik Inuussutissarsiuteqartut Peqatigiiffianiit “Sinniisoq”-miit Kommune Kujallermi pissutsit pillugit ilaatigut uparuaalluta oqaaseqarpugut, tamatumallu kingorna attaveqatigiilerpugut, tamatumallu kinguneranik nerrivimmut ingilluta kaffisoqatigiilluta eqqartueqatigiippugut pissutsinik assigiinngitsunik.

Kaffisoqatigiinnermi tassani malugaara pisortaaneq inuk suliaminut assigiinngitsutigut assut toqqissisimalluni suliaqartoq, minnerunngitsumik apeqqutini annertuuni aamma toqqissisimalluni tunngavilersuillunilu paasinartunngortitilluni nassuiaasoq, taamaammat paaseqatigiinneq annertooq pilersillugu nuannersumik.

Taamanerniillu akuttunngitsumik kaffisoqatigiilluta assigiinngitsunik eqqartueqatigiittalerpugut ulluinnarni suliagut pillugit, matumani aamma pisortaanerup ilaasortatta oqariartuutai assiginngitsut nuannaarluni tusarusuttarpai aamma tusarnaarluartarlugit tamannalumi aamma nuannertarpoq ilaasortat sinnerlugit apuussisuulluni.

Kingullermik naapisimaarnitsinni suliakkiutigaa uanga isumagissagiga tulliani naapinnissaq pisortaanerup allaffianiinngitsoq allami pissasoq, tamannalu pilersaarusioruttornerani manna pisoq tupannartoq pivoq suliakkiutaalu naammassisariaqalerlugu inuulluaqqusinermik.

Kimmip ilaqutai tamaasa atugaanni imaannaanngitsumi misiginneqatigaarput.

Kim Dahlip eqqaaneqarnera ataqqinartuuli.

Jacob G-Motzfeldt
Siulittaasoq
Q.S.I.P. ”Sinniisoq”
Qaqortumi Sulinermik Inuussutissarsiuteqartut Peqatigiiffiat