Arnaq ikinngutaalluartoq, inoqatiminut asannittoq, qiimasoq, anguniagaqallaqqissoq, innuttaasullu atugaat pillugit inerisaanissamut piumassuseqarluartut ilaat Suka K. Frederiksen akornatsinniikkunnaarpoq.
Sukap ilisarisimaleqqaarneraniit tatiginartuunera, isummersullaqqinnera, anguniagaqallaqqissuunera, tamanullu inissaqartitsilluni sullisserusuttuunini ilisarnaatigigai maluginiarsimavara. Taamaattuugami ataqqineqarluni tatigineqarlunilu suleqatikkuminartuuvoq.
Arnaavoq nunatsinni ineriartortitsinissamik anersaaqarluni sulerusuttoq. Tamanna suliffinni assigiinngitsuni atorfilittatut sulinermini, politikkikullu sulinermini takutittuartarpaa.
Kommuni Kujallermi innuttaasut sulisullu pitsaanerpaamik sullinneqarnissaanut pingaartitsisut ilagaat.
Suleqatigiit akornanni nukittoqutaalluni sulilluartuuvoq, silassorissuugami ukiorpassuarni suliffinni assigiinngitsuni misilittakkani kommunimilu ilaasortaasimanerminit pissutsinik inatsisinillu ilisimasaqarluartoq.
Sukap innuttaasut pitsaanerpaamik tatiginarluinnartumik sullinneqarnissaat pingaartitaraa; saaffiginnissuteqartoqartillugulu innuttaasup pitsaanerpaamik sullinneqarnissaanik qulakkeerinninnissaq pillugu eqqaasitsiuartarpoq.
Sullarissuuvoq, ulapittuugaluarlunilu suleqatimi akornanni ullup aallartilluarnissaa pingaartitarigamiuk, ullaakkut sulisut kikkulluunniit peqataaffigisinnaasaannik ataatsimoortitsiuartarpoq; inuunerup naleqassusaanik aammalu imminut eqqarsaatigisarnissaq pillugu sulisunut eqqarsaatersuutissanik tunniussiuartarluni.
Sulerusussuseqartuugami suliassat innuttaasuneerpata sulisuniilluunniit saaffiginnissutaagaluarpata pisarnermisut kiinnerluarluni suliarilluartarpai, matumani unneqqarissuunissaq ilumoorfiginnittuunissarlu ilisarnaatigalugit. Taamaattuugami tamanit naatsorsuutigineqarsinnaajuaannarpoq.
Sulilluarnermigut suleqatiminut innuttaasunullu tunniussimasarpassui puiornavianngilagut, suliarpassuinullu qutsavissaraarput.
Suka arnaavoq nukittooq, napparsimalereeraluarlunimi suliffimminut tunniusimalluni killissani tikillugu sulivoq. Taamaattumik Sukap qimagunnera Kommune Kujallermut, sulisunut, inuiaqatigiinnut, qanigisaanut, ilaqutaanullu nukissanik aallerfigisartagaanut annaasaq annertorujussuuvoq.
Sukap innuttaasunut sullissilluarnissamik pingaartitsinera, kommunitsinni eqqaamaneqartuarumaarpoq, ingerlateqqinneqarumaarlunilu.
Inuunermi sunilluunniit naapitaqarnermi inuunerup ingerlaqqiffissaqartuaannarneranik inuunerpullu nuannersunik immersorniarlugu imminut aamma eqqarsaatigisarnissatsinnik oqariartuuteqartuartarnera eqqaamassavarput.
Suka arnaq, uteriitsoq, tatiginartoq, erinarsornermik nuannaarnermillu nuannarisalik, illalaartarnissamillu inissaqartitsisartoq maqaasissaqaarput.
Kommunalbestyrelse sinnerlugu ilaqutai qimagaasut annaasaqarneranni qamanngavik misiginneqatigingaarpakka, qanortoq Sukap asanninnerujussuanik nukissassinnik tuniorarneqartuarisi.
Sukap eqqaaneqarnera ataqqinartuuli.
Kiista P. Isaksen,
Kommune Kujallermi borgmesteri.