Asasakka nunaqqatikka
Ullut makku atukkagut sungiusimasatsinnit allaaneroqaat, nunatta avataaniit tikittoqarsinnaanngornera ataasinngornermi juunip 15-ianni ammaanneqarpoq, pisortallu nualluutip COVID-19-ip tuniluunnissaa pinngitsoorumallugu paareqqusipput.
Nunatta avammut ammarnerani sapaatip akunneranut inuit 600-nit ikinnerunngitsut tikittartussaapput, misilittakkallu takutereerpaat inuit misissortinnerminni nualluummik tunillatissimanngitsut angalareernermi kingorna misissorteqqinnermi COVID-19-imik tunillatissimasinnaasartut.
Taamaammat nakorsaaneqarfiup katersuunnerit pillugit innersuussutai malikkumallugit COVID-19-illu tuniluussinnaanera pinngitsoortikkumallugu akisussaassuseqartumik inuiattut ullorsiornissaq nunatsinni kommunit assigalugit aaliangiusimavarput.
Katersuuffiunngitsumik inuiattut ullorsiornissamik aaliangiussinitsinni
pakatsisoqarnera paasisinnaavara; maleruagassat kisimiillunga aaliangersagaliarinngilakka, tamattali akisussaffeqarpugut malinnittariaqarnitsinnik.
Inuit uannit ilisarisimannilluartut nalunngilaat inuiattut ullorsiorneq qanoq pingaartitsigineriga, aaqqissuussanilu inuiaqatigiit katersuuttarnerinut najuutissallunga qanoq nuannaritigalugulu pingaartitsigisarnera.
Artornaqaaq assullu ajuusaarnaraluaqaluni maleruaqqusat malinneqartussaatillugit naleqartitat ingerlanniaraluartillugit killilersuutit aaliangiisunngormata.
Taamaakkaluartoq ukioq manna kingumut inuiattut ullorsiornissarput allaanerusumik malunnartinneqassaaq.
Maanna Kommune Kujallermi kulturilerinermik suliaqartut angerlarsimaffitsinniit atortorissaarutit atorlugit isiginnaarsinnaanissatsinnut tusarnaagaqarsinnaanissatsinnillu qulakkeerinninniarlutik ulapipput. Kujataani nipilersortartut inuillu oqaluttuaat tamatsinnut ataatsimoortitsiumaarput.
Kommunip aaqqissuussat inunnik katersuuffiusinnaasut unitsikkaluarai nalunngilara piffinni assigiinngitsuni innuttaasut nammineq aaqqissuussillutik suliaqartunik piareersaateqartoqartoq. Taakkununngali eqqaamaqqunarpoq illoqarfimmiikkaluaraanni nunaqarfimmiikkaluaraanniluunniit pisortat maleruaqqusaat malillugit ingerlatsisoqarnissaa.
Nunatta avataaniit angallanneq ammarneqarnikuuvoq, sapinngisarpullu tamaat atorlugu immitsinnut paarisariaqarput, pingaartumik utoqqartagut, sannginnerusortagullu eqqarsaatigalugit.
Kujataani COVID-19-mik tunillatsittoqassagaluarpat tunillatsisimasoq inuppassuit katersuuffianiissimassanngitsoq qulakkeerniarutsigu akisussaassuseqartumik pisortat maleruaqqusaannik malinnittariaqarpugut. Maannakkumut inuit 100-t sinnerlugit katersuuttoqaqqusaanngilaq, inillu inunnik isersimaffigineqarsinnaasut qatserisartoqarfinnit akuerineqarsimasut amerlanerpaaffissaasa affaannaat isersimasinnaapput.
Eqqaamaasavarput maleruaqqusat silamiikkaluarutta illulluunniit iluaniikkaluarutta atuummata.
Ullut makku atukkagut, COVID-19-imullu mianersornerujussuaq qaangiussimaleriarpat inuiattut ullorsiornerit katersuuttarnerillu kingumut misigisaleqqikkumaarpagut, tamannalu uanga ilissituulli qilanaareqaara, inuiaammi tassaavugut ataatsimoornermik qanilaarnermillu pingaartitsisut.
Ukioq manni inuiattut ullorsiornissarput pisarnermiit allanerusussaagaluartoq ilaquttagut ikinngutigulluunniit ilagalugit ullorsiorluarumaartugut neriuutigaara, tamattalu eqqaamagitigu akisussaassuseqarluta maleruaqqusanik malinninnissarput.
Kiista P. Isaksen
Borgmesteri