Matumani Covid-19-mut sillimaniarnermut atatillugu pisortat inuit 100-t sinnerlugit katersuusseqqusinnginnerat pissutaavoq.
Inuiattut ullorsiornermi ullaakkut nalunaaqutaq arfineq pingasunut Qaqortumi kommunip allaffiata silataani erfalasulerneq ingerlaneqassaaq, tamannalu Kommunip nittartagaatigut toqqaannartumik malinnaaffigineqarsinnaajumaarpoq, kingornalu borgmesteri Kiista P. Isaksen Seekon Radiokkut tusarnaanneqarsinnaasumik oqalugiassaaq.
Nalunaaqutaq arfineq sisamut Gertrud Raskip oqaluffiani naalagiaqatigiittoqartussaammat, nalunaaqutaq aqqanermut inuiattut erinarsuuterput Seekon Radiomi tusarnaarneqarsinnaasumik erinarsoqatigiinnit erinarsorneqalerpat angerlasimaffitsinniit ingiorlugu erinarsoqatigiissaagut.
Borgmesterip oqalugiarnera erinarsoqatigiillu erinarsorneranni ataatsimoorluta erinarsoqatigiinnissarput Kommunip facebookimi quppernerani Seekon Radiomilu malinnaaffigineqarsinnaassapput, taamaalilluni kommunitsinni sumikkaaluaruttaluunniit inuiattut ullorsiornitsinni ataatsimoorfeqassaagut.
Piffinni tamani inuit 100-t sinnerlugit katersuuttoqannginnissaa pisortanit piumasaqaataavoq, taamaammat illoqarfittatsinni nunaqarfittatsinnilu nammineq aaqqissuussilluni ataatsimoortoqassagaluarpat piumasaqaatit malillugit ingerlatsisoqarnissaa eqqaamaqquarput.
Nunaqarfinni inuit 100-t ataallugit innuttaqartut inuittut ullorsiornissamut atatillugu nammineerlutik aaqqissuussisinnaapput.