Pingasunngornermi maajip 20-anni Kommune Kujallermi Kommunalbestyrelse 2019-imut naatsorsuutit akuersissutigai. Naatsorsuutit inernerat naammaginartumik inerneqarpoq, matumani 10,8 mio. koruuninik sinneqartoorfiulluni.
Tamanna ukiup ingerlanerani ingerlatsiviit naatsorsuutinut naapertuuttumik ingerlatsisimanerannik aallaaveqarpoq.
-Kommunimi ingerlatsiviit aningaasaqarnerminnik ingerlatsilluarsimanerat kinguneqarluarpoq, taamaammat kommunimi atorfillit tamaasa ataatsimiititalianilu ilaasortat 2019-imi sulilluarsimanerannut qutsavigingaarpakka, borgmester Kiista P. Isaksen sinneqartooruteqarnermut iluarisimaarinnilluni oqarpoq.
Ukioq 2019 Kommune Kujalliup siunissamut ineriartorneranut assigiinngitsutigut tikkuussiffiuvoq.
Tamanna kommunip innuttaasunik inuussutissarsiuteqartunillu suleqateqarluarneratigut naammaginartumik angusaqarfiuvoq.
-Kommune Kujallermi illoqarfittatsinni nunaqarfittatsinnilu innuttaasut, nammineq kajumissutiminnik suliaqartartut, inuussutissarsiortut matumanilu inuussutissarsiorneq eqeersimaartoq kommunip siunissamut takorluugaasa iluatsinnissaannut tunngaviupput, taamaammat ataatsimoorluta ineriartortitsiniarnitsinni suleqatigiilluarnitsinnut qujanakulooq, Kiista P. Isakasen naggasiivoq.