Kommune Kujallermi meeqqerivinnut utaqqisut allattorsimaffianni utaqqisut akornanni nikerartumik inissisimasinnaaneq takornartaanngilaq, utaqqisummi allattorsimaffianni nr. 12-iusimalluni ilaanni nr. 15-imut kinguariarsinnaasarneq utaqqisuni misigineqarsinnaasarpoq.
-Utaqqisut allattorsimaffianni nikerarsinnaasarneq pingaarnersiuinermik aallaveqarpoq, matumani inunnik isumaginnittoqarfiup iluani sullinneqartut meeraat salliunneqartarput, taamaalillunilu allattorsimaffimmi utaqqisut allat kinguariarsinnaasarput, Kommune Kujallermi Meeqqeriveqarnermut ataatsimiititaliami siulittaasoq Anders Olsen nassuiaavoq.
Utaqqisut allattorsimafiannik tulleriaarineq Inatsisartut inatsisaat nr.16 3.december 2012-imeersoq aallaavigalugu ingerlanneqartarpoq, utaqqisullu eqimattanut arfinilinnut agguataarlugit tulleriiaarinermi inissititserisoqartarpoq.
Meeqqat inunnik isumaginninnermut ataatsimiititaliamit innersuunneqartut eqimattat pingaarnersaattut A-mik nalunaaquterneqarsimapput, aappaattut meeqqat ukiui aallavigalugit meeqqerivimmut nuuttussat B-mi inissisimapput, pingajuattut meeqqat suliffeqartunik imaluunniit ilinniartunik kisermaajusunik pilersuisoqartut C-mi inissisimapput, sisamaattut meeqqat pilersuisui tamarmik suliffeqartut imaluunnit tamarmik ilinniartut D-mi inissisimapput, tallimaattut meeqqamut pilersuisup aappaa suliffeqartoq imaluunniit angajoqqaap aappaa ilinniagaqartoq E-mi inissisimapput, kingullertullu meeqqap pilersisuisui suliffeqanngitsut ilinniagaqanngitsulluunniit F-imi inissisimatinneqarlutik.
Eqimattami sorlermi inissisimaneq aallavigalugu utaqqisut allattorsimaffianni nikerartumik inissisimasinnaasarneq paatsunganermik kinguneqarsinnaasartoq Meeqqeriveqarnermut Ataatsimiititaliami siulittaasup paasisinnaalluarpaa.
-Paasilluarsinnaavakka meeqqerivimmut utaqqisuni allattorsimaffimmiittuutillit nikerartumik inissisimasinnaanerminnik paatsungassuteqartarnerat, tamannali Inatsisartut inatsisaannik tulleriiarisarnermik aallaveqarpoq, Anders Olsen naggasiivoq.