Paasisinnaavara innuttaasut akornanni Covid-19 pillugu ernumasoqarnera, uangami aamma nammineerlunga ilittulli ernumassuteqarpunga.
Nunatsinni nualluutip tuniluuterujussuannginnissaa siunertaralugu upalungaarsimanermik suliaqarnerit kommunit allat peqataaffigisaat suleqataaffigivakka, sulinitsinnilu sapinngisarput tamaat inuiaqatigiinnut tamanut pitsaanerpaamik sunniuteqarniarluta tamaviaarpugut.
Kommunimi suliassarpassuatta ingerlareersut saniatigut Covid-19 pillugu sulineq annertooq suliatsinnut ilanngunnikuummat ulapeqaagut. Kommunimi pisussaaffitsinni sapinngisarput tamaat inuuttaasutta toqqisisimanissaat pillugu suliniuteqarpugut.
Kommunimimi sulisunut Covid-19 pillugu malittarisarisassanik piumasaqaatitalinnik suliaqarnikuuvugut, matumani sulisugut nualluutip tuniluussinnaaneranut illersoratsigit, kommunimiillu inuiaqatigiinnut kiffartuussinitta unittuunnginnissaa eqqummaariffigigatsigu.
Meeqqat atuarfii matuneqarmata angajoqqaat inuiaqatigiinni pingaaruteqartumik suliffeqartut aammalu angajoqqaat kisimiittut suliinnarsinnaaniassammata paarsiffiusinnaasumik neqerooruteqarpugut, inuiaqatigiit unittoornatik ingerlaannarnissaat qulakkeerinneqataaffigerusukkatsigu.
Taakku saniatigut utoqqartagut nualluummut illersorniarlugit utoqqaat illuinut pulaarneqanngikkallarnissaannik kaammattuinikuuvugut.
Pulaartoqarsinnaannginneranilu utoqqaat ilaqquttaminnik takunnissinnaanissaannik periarfissiiniarluta Qaqortumi Pisiffik suleqatigalugu kujataani utoqqaat illuinut tamanut iPadsinik tunissuteqarpugut.
Taakku saniatigut qaammammusiffinni niuertarfiit inoqartaqimmata utoqqaat eqqissillutik niuerniarnissaannik periarfissinniarlugit utoqqalinermusiffissat ullormik ataatsimik siuartillugit aaqqiissuteqarpugut.
Pisariaqarallartillugu COVID-19-mut tunngasunik sulinerput ingerlaannassaaq, innuttaasullu kommunitsinni allannguutinik sulianilluunniit ilisimatittuartassavagut.
Nunatsinni tunillatsisimasut ilisimaneqartut maanna Nuummiipput, maannamullu nunatta sinnerani nualluummik tunillatsissimasunik suli paasisaqanngikkaluarluta Kommune Kujallermi sapinngisarput tamaat nualluutip tuniluutinnginnissaanut suleqataavugut.
Taamaammat manna iluatsillugu nunaqqatinnut kaammaattuutigeqqikkusuppara pisortat innersuussutaat eqqiluisaarnitsigut maleqqissaassagigut.
Matumani aamma Kommune Kujallermi innuttaaqatinnut ataatsimiititaliarsuarmit peqqussutaasoq kaammattuutigeqqikkusuppara: pisariaqavitsinnagu illoqarfinniit nunaqarfinnut nunaqarfinniillu illoqarfinnut angalaqqusinnginneq malinneqartariaqartoq.
Ullut makku atukkagut pillugit aatsaat taama ataatsimoornissarput pingaaruteqartigaaq, taamaammat neriuutigeqaara nunarsuarmi nualluut tuniluuttoq pillugu ulluni makkunani sulinitsinni tapersersoqatigiissinnaanissarput.
Oqaatigeqqissavara inuit ernumassuteqartut paasilluarsinnaavakka, uangami aamma taakkutulli ernumavunga, sapinngisarali tamaat nuallutip siuaruaatinnginnissaanut suleqataarusuppunga.
Periarfissaq manna iluatsillugu peqqussutaasunut paasinnillusi malitsitsisunut, suleqataasunullu tamanut uummatinniit qujarusuppunga, malugivara pisariaqartitsilluinnarfimmi ataatsimoorneq pigigipput.
Tamatta paarilluarisa.