Kommune Kujallermi utoqqaat illuini najugaqartut ulluni makkunani pulaartoqarsinnaanngikkaluartut, maanna iPad atorlugu pulaartoqarsinnaanngorput. Tamanna pisinnaanngorpoq kommunip Qaqortumilu Pisiffiup suleqatigiillutik utoqqaat illuinut iPadinik sisamanik tunissuteqarneratigut.
-Utoqqartagut Covid-19-imut illersorniarlugit utoqqaat illuinut pulaartoqannginnissaanik kommuniminngaanniit peqqussuteqarpugut. Taamaakkaluartorli utoqqaat illuini najugaqartut ilaquttaminnit ikinngutiminniillu pulaarneqarsinnaanngitsut ullut makku assut eqqarsaatigisarpakka, qularnanngitsumimmi ilaquttaminnut takusuillutik ullut makku atussammatigit. Taamaammat aaqqiissutissamik eqqarsarlunga kommuniminngaanit iPadinik tunissuteqarnissatsinnik isumassarsisimavunga, tamannalu pisinnaammaat nuannaarutigeqaara, Kiista P. Isaksen oqaluttuarpoq.
iPadit utoqqaat illuinut tunniunneqartut qanoq atorneqartussaanerat pillugu periusissiortoqassaaq. iPadit marluk Qaqortumi ullumimiit atorneqarsinnaanngussapput, ullunilu tulliuttuni Nanortalimmi Narsamilu iPadit nassiunneqartut tiguneqarsimaleriarpata aamma atorneqalerumaarput.
-Utoqqaat illuini najugaqartunut atortorissaarutit atorlugit pulaarsinnaanngornerup atorluarneqarnissaa neriuutigeqaara, taamatummi attaveqarnitsigut utoqqartagut qanimut najunngikkaluarlugit isumannaatsumik oqaloqatigisinnaavagut, Kiista P. Isaksen naggasiivoq.
Utoqqarnut ilaqutaasut qanoq attaveqarsinnaanertik pillugu najugarisami utoqqaat illuannut paasiniaasinnaapput.