Tanbreez Mining A/S-ip Killavaat Alannguanni aatsitassanik qaqutigoortunik piiaanissaanut qinnuteqaat aatsitassanut inatsimmut piaartumik naapertuutilersinnaanera Naalakkersuisup nalunaarutigaa.
- Ukiuni arfineq marlunngulersuni Killavaat Alannguanni aatsitassarsiornissamut qinnuteqaatip akuersissutigineqarnissaa kommunimit ilungersuutigalugu anguniagarigatsigu ullumikkut killiffik nuannaarutigeqaara. Tamanna kujataani suliffissarpassuarnik nassataqartussaassaaq, Kiista P. Isaksen oqarpoq.
Greenland Minerals A/S-mi Avatangiisinut Kingunissat pillugit Nalilersuinerit (VVM) inaarsarneqaleruttorput. VVM-ilu aatsitassanut inatsimmut naapertuuteriarpat, Naalakkersuisut tamanut ammasumik tusarniaanerit aallartissavaat.
Suliap tamaanga killinnerani alloriarneq Kommune Kujalliup ineriartoqqinnissanut tikkuussisoq borgmester Kiista P. Isaksen isumaqarpoq.
-Kommunalbestyrelsimi kommunitta ineriartorfiulluni alliattoqqinnissaa suliuniutigaarput. Suliniuteqarnitsinnilu innuttaasunik peqataatitsinerulluta ineriartortitsiniarnitsinni kujataani innuttaasut ikiliartornerat unitsinnikuuaarput, taamaammat maanna suliffinnik pilersitsisoqartussanngorneranut alloriaqqinneq innutaasut amerlanerulernissaannik nassataqartussaammat isumalluarfigaara, Kiista P. Isaksen oqarpoq nangillunilu.
-Taamaammat periarfissaq manna iluatsillugu Naalakkersuisut taama nalunaaruteqarnerannut qujarusuppunga, qujanaq kujataata ineriartoqqinnissaannut periarfissanut aqqutissiuigassi, Kiista P. Isaksen nuannaaqisoq taama naggasiivoq.