Kommunip pingaarluinnartumik inuiaqatigiinni ingerlatsinermik inissisimanera, kommunimilu innuttaasorpassuarnut sunniuteqarnera eqqarsaatigalugu utoqqaat illuisa aamma meeqqeriviit, atuarfiit aamma sunngiffimmi ornittakkat, qatserisoqarfiit aamma annaassiarnerit allallu illersorneqarsinnaasumik isumannaatsumillu ingerlanneqarnissaat kommunip akisussaaffigaa.
Kalaallit Nunaat siullerpaamik COVID-19-imik nappaatilimmik nalaataqassappat pingaaruteqarpoq inuiaqatigiinni suliassat naammassisinnaanngorlugit naammattunik sulisoqarnissaq. Taamaammat COVID-19-ip (coronavirusip) tunillaassuunnissaata pinaveersaartinnissaa kommunip akisussaaffigaa.
Tamanna tunngavigalugu pisortaanerit ullumimiit Kommune Kujallermi atorfilinnut makku aalajangerpai:
- Sulinermut atatillugu Kalaallit Nunaata Danmarkillu avataanut angalasoqassanngilaq. Suliffimmut atatillugu kinguartinneqarsinnaanngitsumik angalanerit taamaallaat pisortaqarfiup akuersineratigut ingerlatsivimmilu pisortap innersuussineratigut ingerlanneqarsinnaapput
- Sulinermut atatillugu sulisut kikkulluunnit kommunip avataani aaqqissuussinernut/sammisanut peqataaqqusaanngillat.
- Suliffimmut tunngatillugu pikkorissarnerit atuarnerillu unitsinneqarallassapput.
- Sulisoq kinaluunniit suliffeqarfiup avataani ataatsimiinnerni peqataassanngilaq.
- Tele aqqutigalugu attaveqaatit, soorlu videokonference, Skype assigisaallu taarsiullugu atorneqarnissaat innersuussutigineqarpoq.
- Ingerlatsiviup pisortaata piviusumik nalileereerneratigut ataatsimiinnernut kinguartinneqarsinnaanngitsunut peqataasoqarsinnaavoq.
- Atorfillit Nunanut Allanut Ministeriaqarfiup allattorsimaffia najoqqutarlugu nunanit aappaluttumik aappalungusersumilluunniit nalunaarsukkanit aallarsimappata ulluni 14-ini angerlarsimaffimminni mattussaaqqassapput.
- Utoqqaat illuini pisariaqanngitsumik pulaarneq innersuussutigineqanngilaq. Innersuussut una innuttaasunut tamanut aamma atuuppoq.
Qulaani aalajangiussat Kommune Kujallermi atorfilittut sulisunut tamanut ullumimiit atuutilerpoq.
Kommune Kujalliup soorunalimi sulisut sunngiffimminni sulerissanersut aalajangiiffigisinnaanngilaa – kisianni sunngiffimmi sammisassat sorliit peqataaffigerusunnerlugit sulisut naliliisarnissaat innersuussutigaa.
Nalinginnaasumik pinaveersaartitsinermut pissusilersornissaq:
Illit imminut allallu illersorniarlugit COVID-19-imut nutaamut tunillatsinnaveersaarit.
COVID-19-ip nutaap tunillaassuunnera eqqiluisaarluarnikkut pitsaanerpaamik pinaveersaartinneqarsinnaavoq. Tassa imminut illersorumalluni pingaartumilli allat illersorumallugit, ingammik utoqqaat sanngiitsullu. Taamaammat siunnersuutitsialaat arfinillit malinneqarnissaat kaammattuutigissavarput. Suliffeqarfinnut atuupput, aamma tamat ornittagaanni, assersuutigalugu pisortat allallu angallassissutaannut ilaagaanni.
Tunillatsinnissaq pinaveersaartiguk:
- Akulikitsumik errortortarit imaluunniit assanut bakteriaajaat (håndsprit) atortaruk.
- Tangajoruit quersoruilluunniit talinnik asseruk - assannik assernagu.
- Assamminnerit, ulussakkut kunissinerit eqitaarinerilllu pinaveersaakkit - allap timikkut attornissaa killeqartiguk.
- Eqqiluisaarneq eqqumaffigiuk - angerlarsimaffimmi aammali suliffinni.
- Utoqqaaneruguit imaluunniit anigorsinnaanngisamik nappaateqaruit - allat ungasinniakkit qanilleqqunagillu qinnuigalugit.
- Napparsimaleruit angerlarsimaannarit.
Napparsimasoqartillugu pingaartumik utoqqaat angerlarsimaffianni – meeqqerivinni – atuarfinni sulisut sukannernerusumik eqqumaffigineqarnissaat innersuussutigineqarpoq.
Kommune Kujallermi sulisut COVID-19-imut tunngatillugu apeqqutissaqassappata peqqissutsimut oqartussat nittartagaat innersuussutigineqarsinnaavoq: www.nun.gl, soorluttaaq paatsuungasoqartillugu kommunimi Sulisoqarnermut Immikkoortortaqarfik attavigineqarsinnaasoq.
Ilitsersuut una maannakkuugallartumut 2020-mi tallimanngornermut apriilip qulingata tungaanut atuutissaaq.