Asasagut innuttaasut
Sapaatip akunnerata siuliani Kommune Kujallermi Kommunalbestyrelsip aamma pisortaqarfiup innuttaasut eqimattat kommunip matoqqaneranik misigisimanertik aallaavigalugu akerliussutsimik takutitsisut isiginnaarpaat
Innuttaasut tunngaviusumik inatsisitigut isumannaagaasumik akerliussutsimik takutitsinissaminnut pisinnaatitaaffitsik allannguinissamut oqariartuuteqarlutik atorunikku soorunami tusaaniarlutalu pimoorullugu tigussavarput.
Suliatsinnik naammagittaalliutiginnittoqarnera imaannaanngitsorujussuartut tiguarput, kommunimilu suliat pitsaanerusumik kikkunnut tamanut paasissutissiissutigisarnissaat misissussavarput.
Kisianni aamma akerliussutsimik takutitsineq ajoraluartumik pasilliutinik saqqummiussiffittut atorneqarpoq, tamannalu kikkut tamarmik oqartussaaqataanerannut tunngatillugu assuarnartutut aamma naleqqutinngitsutut taaneqaannarsinnaalluni. Annertunerusumik ammanerunissamik kissaateqarnerup saniatigut oqariartuutit ilagaat ”atorfimmi pissaanermik atornerluineq”.
Kommunip tupigusuutigaa pasilliut taanna akerliussutsimik takutitsinerup nalaani saqqummiunneqarmat, kisiannilu akerliussutsimik takutitsisunit oqaatigineqarsinnaanani pasilliut sumik tunngaveqarnersoq.
Tunngavissaqarluarpoq atorfillit aamma politikerit taamaattumik ilumoorsaanngitsumik inuttut saassussineq ataqqinassusiiaanertut tigussappassuk, aamma eqqunngitsunik pinerluttuliornermut tunngasumik pasilliinermik allanut saqqummiussinerup akisussaaffimmik nassataqarnera pissusissamisoorpoq.
Kommune Kujalliup uggoraa innuttaasut eqimattat kommunip suliaanik ammanerunissamik kissaateqarnerat asuli pasilliutit aaqqutigalugit tatigisaajunnaarnermik kinguneqassappat.
Kommunip nuannaarutigaa innuttaasut kommunip suliaanut soqutiginninnertik takutimmassuk, aamma uagut innuttaasut kommunimik pitsaanerusumik pilersitsinissamut kissaataat naammassiniarlugu iliuuseqassaagut, kisianni oqaloqatigiinneq soorunami pimoorussamik aamma tutsuiginartumik tunngaveqassaaq.
Innuttaasutut suliat aalajangersimasut pillugit kommune malittarisassanik unioqqutitsisutut isumaqarfigigaanni naatsorsuutigaarput kommunip borgmesterianut imaluunniit allaffissornikkut aqutsisunut saaffiginnittoqarnissaa, pasilliutinullu naleqquttunik uppernarsaatinik saqqummiussisoqarluni.
Inussiarnersumik inuulluaqqusilluta
Borgmester Kiista P. Isaksen aamma kommunaldirektøri Kim Dahl