Tassa imaappoq B-249 Qaqortumi Torvevejimiittoq 1919-milu sanaajusoq ukioq manna ukiunik 100-nik pisoqaassuseqalerpoq. Nunatta Katersugaasiviani Kalaallit Nunaanni illut eriagisassat allanngutsaalisassallu nalunaarsorsimaffianni illu taanna "Allanngutsaaligassatut" nalunaarsorneqarsimavoq (Suussuseq 2) Nunatta Katersugaasiviata oqaatigaa illu allanngutsaaliuganngortittariaqaraluartoq, peqqutigalugu sananeqarmalli allannguisoqarsimanngimmat, taamaalillunilu ullumikkut taamanili sananeqarsimaneratulli isikkoqarluni.
Kisianni 2019-imi upernaajunerani illumik piginnittup Niels K. Blochip kissaatigisimavaa illup isua igalaavilu kangimut sammisut nutarsarneqassasut, piffissap ingerlanerani qisuttaasa ilaat anorimit silamillu peqquteqartumik pisoqalisimammata, taamaalillutillu ussiitsunngorsimallutik. Nutarsaaneq taanna pitinnagu Niels K. Blochip Teknikkimut Avatangiisinullu Ingerlatsivik attavigaa nutarsaanissami najoqqutassaasinnaasunik apeqqutilliilluni. Saaffiginnissummut tamatumunnga tunngatillugu Teknikkimut Avatangiisinullu Ingerlatsiviup illumik piginnittuusoq paasitippaa illoqarfiup qeqqani eriagisassanut pilersaaruteqartoq, tassanilu illut pisoqqat oqaluttuarisaanermullu pingaarutillit qanoq iliuuseqarfigineqarsinnaanersut ersarilluinnartumik taaneqarluni.
Taamaalilluni Teknikkimut Avatangiisinunullu Ingerlatsivik qanimut suleqatigilluinnarlugu kissaatigisaq annertooq toqqammavigalugu illup piginnittuata illu nalitooq najugaqarfigisarlu pisinnaasannguarlu tamaat najoqqutaralugu illup aallaqqaataaniit isikkua attanniarlugu naammassiniarsimavaa, iluatsillugulu allanngutsaalineqarnissaa angusimallugu.
2019-imi aasaanerani nutarsaanerup ingerlanerani illu pillugu Nunatta Katersugaasivia ima oqaaseqarpoq:
"Illu eriagisassaalluinnarpoq illoqarfiullu oqaluttuassartaanut assorsuaq soqutiginaateqarluni. Saffiortorsuup John Høeghip (Ujuukuluup) illua Qaqortumi illut eriagisat nalunaarsorfianni 1986-imeersumi ajunngilluinnartumik allaaserineqarpoq, tassaalluni illu peqqissaartumik qajannaatsumillu sananeqarsimasoq iluatungaani saarngini katitikkani issusuunik marlunnik qaleriinnik salligalersorneqarsimalluni, silataatungaanilu pappiliarsuarnik akornisigut ussissarneqarsimasunik sisamanik qaleriinnik salliligalersorneqarsimalluni.
Piginnittoq paasisinnaalluarparput nunatsinni kulturikkut kingornussat ilaannik piginnittuunini iluatsilluarsimammagu. Illu 1918-imiit 1919-ip tungaanut sananeqarpoq, ullumikkullu ukiunik 100-nik pisoqaassuseqarluni.
Nunatta Katersugaasiviata innersuussutaa Kommune Kujalliup akuererusuppaa aammattaaq illumik piginnittup illulioriaatsimik aallaqqaataaniit pisimasumik ataqqinninnera akuersaarlugu. Tamanna kommunip iliuusererusuppaa Kommune Kujalliup piginnittumut 2019-imi Illuliortaatsimut Nersornaammik tunisinermigut. Ataqqinnilluni suliniutaa nersorniarlugu B-249-mik piginnittumut savimineq saattukujooq illumi ersarissumut inissitassaq tunniunneqassaaq, tassanilu ima allaqqasoqarpoq:
”Kommune Kujalliup illumik eriagisamik
peqqissaartumik nutarsaanermi
2019-imi Illuliortaatsimut Nersornaasiinera”
Nersornaasiinermullu atatillugu illumik piginnittoq 10.000 koruuninik tunineqarpoq.