KUJATAA MAKEQQISSAAQ
Naalakkersuisunut saqqummiussineq
Kujataani suliassaqarfinni inuussutissarsiutinilu tamani, soorlu angallannermi attaveqaatinilu, takornariartitsinermi, aatsitassarsiornermi, kulturimi sunngiffimmilu, ilinniartitaanermi, aalisarnermi, piniarnermi allanilu, kinguariartornerup siuariartornermut saatsinneqarnissaaa suliassarujussuuvoq.
Siunertaq: Kujataa najugarissallugu kajungernartoq
Kujataani Inuussutissarsiornermut Siunnersuisoqatigiit sulillutik aallartilluavereerput. Inuussutissarsiornermut Siunnersuisoqatigiit suliassaat angniagaallu pingarnerpaaq tassaavoq Kujataani inuuniarnerup pitsaanerulernissaat aqqutissiuissalluni, taamaaliussaarlu kikkut tamarmik– utoqqaat, meeqqat, nunaqarfimmiut, savaatillit il.il. - iluaqutissaannik inuussutissarsiornermut tapersersuineq aqqutigalugu.
Anguniagaq qitiunerpaaq tassaavoq Kujataa najugaqarfissatut kajungernartunngortissallugu. Siunissamut takorluukkat pillugit ataatsimiinnermini ’kajungernartup’ ilisarnaatissai pillugit siunnersuisoqatigiit isumaqatigiipput tassaassasut: aaqqissuussinerit ilaqutariinnut naleqqussakkat, inissiat ullutsinnut naleqquttut, inoqarfiit tamarmik akornanni suleqatigiinneq, ukioq kaajallallugu nunanit allanit timmisartukkut attaveqarneq, sunngiffimmi sammisassat amerlanerusut pitsaasullu, sutigut tamatigut attaveqatigiinneq suleqatigiinnerlu, ammasumik ingerlatsineq, ukioq kaajallallugu takornariartitsineq, suliffiit soqutiginartut, inuit amerliartornerat, timersorneq peqatigiiffeqarnerlu ingerlalluartut, angallanneq aalaakaasoq allarpassuillu.
Inuussutissarsiornermut Siunnersuioqatigiit aallartereerput
Januaarip qiteqqunnerani Inuussutissarsiornermut Siunnersuisoqatigiit pernaammik ataatsimiikkamik periarfissat aporfiusinnaasullu suugalugit aporfilersorfiunngitsumik oqallisigaat, tamatumalu kingorna ineriartorneq pimoorussamik aallartikkumallugu suut salliutinneqassanersut eqqartorlugu.
Quleqquttat tamakku aallaavigalugit inuussutissarsiornermut siunnersuisoqatigiit 31. januar Naalakkersuisunut qassiinut atorfilittaannullu saqqummiipput, inussiarnersumik taamaattorli aalajaatsumik oqariartuut pingaarneq unaavoq: Kingusinaartoqassanngippat massakkut iliuuseqartoqartariaqalerpoq.
Innuttaasut sapinngisaq tamakkerlugu peqataatinneqarnissaat Inuussutissarsiornermut Siunnersuisoqatigiinnut pingaaruteqarpoq. Taamaammat Inuussutissarsiornermut Siunnersuioqatigiit pilersaarput upernaap ingerlanerani illoqarfiit nunaqarfiillu tamaasa tikillugit inui isummersoqatiginiarlugit. Kommunip inuisa saqqummiussaat tunngavigalugit Inuussutissarsiornermut Siunnersuisoqatigiit Kommune Kujallermik suleqateqarlutik inuussutissarsiutinik ineriartortitsinermut periusissiussapput siunissamut qaninnerusumut ungasinnerusumullu sammisumik.
12. september 2018 inuussutissarsiorneq pillugu isumasioqatigiinnermi Kommune Kujallermi Inuussutissarsiornermut Siunnersuisoqatigiinnik pilersitsisoqarnissaanut tapersersuineq tunngavigalugu 14. december pilersitsiviusumik ataatsimeersuarnermi Inuussutissarsiornermut Siunnersuisoqatigiit pilersinneqarput. Siunnersuisoqatigiit Kommune Kujallermi illoqarfinnit tamanit, aamma Narsarsuarmit, ilaasortaaffigineqarput. Siunnersuisoqatigiinni ilaasortat tamarmik Kujataa pillugu sulinissamut allannguinissamullu piumassuseqarput. Inuussutissarsiornermut Siunnersuisoqatigiit sulineranni toqqammavissaq 12. september 2018 inuussutissarsiorneq pillugu isumasioqatigiinnermi oqaluuserineqartunik kaammattuutigineqartunillu aallaaveqarpoq, taamanilu ilaatigut aatsitassarsioqatigiinnut suleqatigiinnissamik isumaqatigiissusiornissaq isumasioqatigiinnermi saqqummiunneqartoq tapersersorneqarpoq. Inuussutissarsiornermut Siunnersuisoqatigiit Kommune Kujalliup nittartagaani qupperneqalernissartik sulissutigaat, tassanilu suut tamarmik saqqummiunneqartassapput kikkulluunniit kiisalu inuussutissarsiortut siunnersuisoqatigiit sulinerannut allanullu malinnaasinnaaqqullugit.
Ilaasortat
Siulitaasoq: Rasmus C. Rasmussen
Siulittaasup tullia/ Qaqortumit ilaasortaatitaq: Johan Arne Fleischer
Narsarsuarmit ilaasortaatitaq: Storch Lund
Nanortalimmit ilaasortaatitaq: Poul-Erik Frederiksen
Narsamit ilaasortaatitaq: Pavia-Peter Fontain