Juunip arfineq-aappaanni 2022 Narsarsuup siunissaa pillugu suleqatigiissitaq sisamassaa ataatsimiippoq, suleqatigiissitamiillu juunimi suliniutissat paasissutissiissutigineqarput.
Juunip 13-ianniit 17-iannut: Mittarfeqarfinniit Narsarsualiartoqassaaq mittarfimmilu aamma akunnittarfimmi sulisut tamarmik immikkut apersoneqassallutik, taamatuttaaq sulisut ataatsimiisinneqassapput.
Juunip 13-ianniit 15-iannut: Narsami Majoriamiit Narsarsualiartoqassaaq, inuillu ataasiakkaat suliffeqarnermut tunngasunik apeqquteqarumaartussat siunnersorneqarnissaannik neqeroorfigineqassallutik.
Juunip 22-anni: Innovation South Greenland Narsarsuup siunissaa "Narsaarsuaq 2031"-mik qulequtserlugu isumasioqatigiissitsillunilu suleqatigiissitanut sammisaqartitsissaaq, matumanilu innuttaasut suliffeqarfiillu inuussutissarsiutitigut suliniutissanut siunnersuutit oqallisigineqarnissaannut qaaqqusilluni.
Namminersorlutik Oqartussat kommunilu misigisipapput Narsarsuarmi illuutinik pisinissamik soqutiginnittoqartoq, tamannalu suleqatigiissitap maluginiarpaa. Taamaammat piffissami aggersumi tuniniaanermi malittarisassat atuuttut najoqqutaralugit peqataasut illuutit tamanut ammasumik tuniniassavaat.
Aammattaaq septembarip qeqqata missaani suleqatigiissitaq killiffissiorluni ataatsimiissaaq, matumanilu suliniutit ingerlanneqartut pillugit killiffiit inerniliussaagallartullu innuttaasunut saqqummiutissallugit. Ataatsimiinnermi Ineqarnermut Attaveqaasersuutinullu Naalakkersuisup amma Kujallermi kommunalbestyrelsip peqataanissaat pilersaarutigineqarpoq.