Meeqqat inuusuttullu pillugit nalunaarutiginnittussaatitaaneq
Nalunaaruteqarneq tassaavoq innuttaasumit pisortaniluunniit sulisumit, meeqqamik inuusuttumilluunniit 18-it ataallugit ukiulimmik ernumassuteqarluni saaffiginninneq.
Meeqqanut ernumassutit ilaatigut ukununnga tunngasinnaapput:
Meeqqat atuarfimmut takkunneq ajortut, meeqqat nerisinneqarneq ajortut, angerlarsimaffimmi aanngajaarniutinik aalakoornartunillu ajornartorsiuteqarfiusumi meeqqat angerlarsimaffeqartut, meeqqat tilluusallit, meeqqat kinguaassiutitigut atornerlugaasimanerinut pasitsaassinerit, meeqqat unnuakkut angerlanngitsoortut peqqutaasullu allat meeraq pillugu ernumalersitsisut.
Innuttaasutut kommunimut allakkatigut, oqarasuaatikkut namminerluunniit ornigulluni saaffiginninnikkut meeqqap inuusuttulluunniit inuuneranik, peqqissusaanik ineriartornerataluunniit navianartorsiorsinnaaneranik ernumagisaqaruit inunnik isumaginnittoqarfik nalunaarfigissavat.
Pisortani sulisut pasitsaassaqarunik meeraq inuusuttorluunniit immikkut ittumik tapersersortariaqartoq, tamanna kommunimut nalunaarutigissavaat.
Qaqugukkut nalunaaruteqartoqassava?
Ilisimagukku meeraq inuusuttorluunniit 18-it ataallugit ukiulik isumaqarfigisat/ilisimasalluunniit peqqissutsimigut ineriartornerminiluunnit navianartorsiorluni inuusoq kommunimut nalunaaruteqartussaatitaavutit.
Meeraq inuusuttorluunniit pillugu nalunaaruteqaruit sapinngisamik tamakkiisuunissaa pingaaruteqarpoq. Nalunaaruteqarneq sapinngisamik pissusivinnik takusanillu aalajangersimasunik tunngaveqassaaq (takusatit, tusakkatit il.il.)
Eqqarsarluaqqaarluni tamatigut nalunaaruteqartoqartariaqarpoq, kisiannili meeqqap inuusuttullu inuunera, atugarisai siunissaalu pineqartillugit nalornissuteqarnermi meeraq inuusuttorlu tamatigut eqqarsaatigineqassapput.
