Illuliorusuppit, illut alliniarpiuk, imaluunniit illu pioreersoq allanngortinniarukku taava sanaartulinnginninni akuersissutit assigiinngitsut peqqaassavatit.
Nutaanik sanaartugassaqaruit siullertut pingaarnertullu nunaminertamik atugassinneqarsimassaatit. Alliliiniaruit nunaminertap atugassiissutigineqarsimasup kiisalu nunaminertamik atugassiinermi piumasaqaatit naapertorlugit sananeqarnissaa qularnaassavat.
Nunaminertamik atugassanngortitsineq sumiiffimmi kissaatigisanni sananissamut akuersissutaavoq. Tamatumunnga pissutaasoq tassaavoq Kalaallit Nunaanni nunaminermik piginninneq ajornarmat. Paarlattuanik inuit nunamik atuisinnaatitaapput. Nunaminertamik atugassanngortitsineq nunamik aalajangersimasumik atuisinnaatitaaninnut uppernarsaataavoq.
Nunaminertamik atugassinneqarsimaguit sananissamik akuersissummik qinnuteqarsinnaavutit.
Sanaartorneq akuersissuteqarani aallartinneqarsinnaanngilaq. Nutaamik illuliorniaruit imaluunniit illut annertuumik allanngortinniarukku sananissamut akuersissummik qinnuteqassaatit. Sananissamut akuersissut tassaavoq uppernarsaat, uppernarsaammi sanaartukkat suut pillugit akuersissuteqarnersutit nassuiaatigineqarput.
Kommunini tamani sanaartornermut oqartussaqartarpoq illuliariniakkavit, imaluunniit allanngortitsiniarnivit sanaartornermi malittarisassanik eqqortitsineranik qularnaarisussanik. Sanaartornermut maleruaqqusani qassiinik teknikkimut malittarisassaqarpoq maleruagassaqarlunilu sanaartornerup sunik eqqortitsinissaanik imaqartunik, soorlu aaqqissugaaneranut, ikuallattoornissamut isumannaallisaanermut, nipimut tunngasut, illup iluata silaannaanut, kiisalu sanaartukkap patajaassusialu kiisalu iikkat napatitsisunut tunngasunik. Taamaammat sanaartornissamik qinnuteqaat qassiinik paasissutissartassaaq ilitsersuummi uani takuneqarsinnaasunik, ” uani ”
Malugiuk
Sananissamut akuersissummik aatsaat pereersimaleruit sanaartulersinnaavutit kiisalu immikkut akuersisoqassappat immikkut akuersisoqartinangu sanaartorneq aallartissanngilaq.
Suliap naammassineranik nalunaarutiginninneq atulerneqarnissaanullu akuersissut
Sanaartorneq naammassippat illuliornermut oqartussaasup illu akuersissutigissavaa. Sanaartorneq naammassippat suliap naammassinera kommunimi sanaartukkat teknikikkut misissorneqartarneranni suliassanik ingerlatsisartumut nalunaarutigineqassaaq. Sanaartorneq akuerineqarsimappat atulerneqarnissaanut akuersissummik taaneqartartoq pissarsiarissavat, taamaalillutit sanaartorsimasat atorsinnaanngussavat, assersuutigalugu illutaannut iserterlutit.
Sullissinermut akit
Najukkanni kommunip sullissivianut saaffiginnillutit akinik paasiniaasinnaavutit.
Sanaartornermut oqartussat
Kommune Kujallermi sanaartornermut oqartussat oqarasuaat: 70 41 00, mail teknik@kujalleq.gl taavalu Narsami kiisalu Nanortalimmi innuttaasunik sullissivinni teknikkeqarfinni sanaartornermi suliassalerisut ilitsersuisinnaallutillu akuersissutinik pisariaqartinneqartunik tunniussinnaapput.